Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 03 maiu 2021 (TATOLI) – Ministériu Ensinu Superior Siénsia no Kultura  (MESSK) hamutuk ho Universidade Nasionál Timor-Lorosa’e (UNTL)  no Institutu Politéknika Kay Rala Xanana Gusmão Betano (IPB)  selebra nota entendimentu atu prepara rekrutamentu ba estudante foun-sira.

Ministru Ensinu Superior Siénsia no Kultura (MESSK) Longuinhos dos Santos, informa implementasaun prosesu asesu engeresu ne’e kompleksu tebes. Tan ne’e mak MESSK  ho UNL no IPB halo koordenasaun hodi realiza akordu nota entendimentu ne’e para atu fó biban ba parte tolu bele responsabiliza hotu iha prosesu rekrutamentu ba estudante fou ne’ebé atu asesu ba UNTL no IPB iha 2022.

“Ita hakarak atu hateten katak prosesu rekrutamentu bá estudante fou-sira atu asesu bá UNTL no IPB ne’e la’ós responsabilidade Governu nian de’it, maibé UNTL ho IPB nian mós,”. Ministru Longuinhos dos Santos, haktuir ba jornalista sira iha salaun enkontru MESSK, Comlera, Dili, segunda ne’e.

Ministru Longuinhos afirma katak Ministériu Ensinu Superiór Siénsia no Kultura hamutuk ho UNTL no IPB selebra akordu ne’e tanba iha ona konkordánsia bazeia ba  estabelesimentu artigu 3 aliña primeiru dekretu lei númeru 36/ 2009 loron 30 dezembru ne’ebé fó biban hodi forma KAEES. Funsionamentu KAEES nian maka  atu hala’o nafatin ninia kna’ar  ka funsaun atu bele asegura prosesu asesu enegresu ba IESP rua ne’e iha 2022.

Magnífiku Reitór UNTL, João Soares Matins, akresenta katak depois selebra tiha akordu entendimentu ne’e, UNTL hahú halo ona ninia preparasaun parese iha juñu sei selebra enkontru iha nivel fakuldade hodi rona mós sujestaun dekanu-sira nian kona-ba estudante hirak mak UNTL atu rekruta iha 2022.

Iha biban ne’e prezidente IPB, Acasio Cardoso Amaral realsa katak akordu entre parte tolu ne’e foin mak realiza iha tinan ida tanba antes ne’e laiha akordu, tan ne’e mak dala barak mosu dezentendimentu iha prosesu sira.

 “Akordu ne’e para atu halakon de’it ideia ne’ebé lahanesan tuir perspetiva públiku nian iha prosesu asesu ba estudante foun ne’ebé atu tama iha Instituisaun rua ne’e,” nia hateten.

Jornalista : Tomé Amado

Editór : Francisco Simões

HAKEREK NO HATÁN

Please enter your comment!
Please enter your name here