Membru PNTL hosi Bataliaun Orden Públika (BOP), hala’o patrullamentu hodi asegura sidadade Dili durante periúdu serka sanitária, (29/03/21). Imajen Tatoli/António Gonçalves.

DILI, 30 abríl 2021 (TATOLI)—Konfrontu entre grupu joven ne’ebé akontese iha área ponte Becora, Postu Administrativu Cristo Rei, Munisípiu Dili, rezulta karreta patrullamentu Polísia Nasionál Timor Leste (PNTL) eskuadra Becora-nian ida rahun, no polísia konsege detein suspeitu na’in-14.

Komandante PNTL Munisípiu Dili, Superintendente Xefe, Henrique da Costa, informa asaun krime tuda-malu iha kinta (29/04), tuku 24:00 otl, halo populasaun iha área ne’e pániku no afeta tebes ba movimentu iha área ne’e.

Notísia relevante:PNTL detein pasiente na’in-haat baku médiku iha izolamentu Tasi-tolu

“Tuda-malu iha ponte Becora, polisia halo duni atuasaun. Maibé, grupu rua ne’e mós tuda ita-nia karreta polísia ida to’o rahun. Polísia konsege detein suspeitu na’in 14,” Superintendente Xefe, Henrique da Costa, hateten ba jornalista-sira iha Komandu PNTL, Caicoli Dili, sesta ne’e.

Oras ne’e daudaun suspeitu-sira subete ona ba prosesu investigasaun durante oras 72, iha sala investigasaun PNTL Dili, hodi hein submisaun prosesu ba Ministériu Públiku (MP).

PNTL kontinua rekolla informasaun hosi autoridade lokál no sasin-sira, kona-bá motivu loloos hosi kazu tuda-malu ne’ebé deskonfia envolve grupu joven Organizasaun Arte Marsiál.

Komandu PNTL Dili mós koloka kedan membru hodi halo seguransa másima iha fatin ne’e, nune’e antesipa labele mosu-tan konfrotasaun.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here