Presidente CI, Virgílio da Silva Guterres. Imajen TATOLI/Antonio Goncalves

DILI, 03 maiu 2021 (TATOLI)—Conselho de Imprensa (CI), foin lalais ne’e relata rezultadu monitorizasaun no anlize ba públiku katak jornalista timor-oan barak mak viola kódigu étika jornalístika no jornalista Timor-oan nia kualidade monu makaas iha ámbitu propagasaun COVID-19 ne’e.

Notísia Relevante: Kualidade jornalizmu iha Timor-Leste monu makaas

Prezidente Conselho de Imprensa (CI), Virgílio da Silva Guterres, hateten rezultadu analize trimestre dahuluk (janeiru-marsu) ne’e relata bazea ba sasukat importante tolu (3) mak faktu, dadus no fonte.

“Ida-ne’e mak sai sasukat ba ami atu haree katak faktu katak COVID-19 iha maibé fonte atu klarifika mak la loos. Ha’u aprezenta faktu ida kona-ba COVID-19 nian, iha Tasi-Tolu ema kontajen ona. Entaun fonte justifika ba nia faktu ne’e la’ós ba ema polítíku maibé ita tenke ba konfirma iha ekipa pesoál saúde sira. Aspetu tolu mak sai sasukat ba CI hodi halo análiza,” Virgílio da Silva Guterres hatete ba Agência TATOLI, iha nia knaar fatin Quintal Bboot, Dili, segunda ne’e.

Nia hatutan, jornalista sira tenke hatene katak faktu ne’e ema presiza duni ka lae, fonte ne’ebé jornalista buka ne’e relevante ka lae no ninia klarifikasaun sira-ne’e natoon ona ba públiku ka lae ne’e, jornalista sira tenke tetu.

Purezemplu, mídia Rádiu Televizaun Timor-leste (RTTL), bainhira halo kobertura iha terrenu kona-ba seguransa sira dalan públiku, entaun RTTL fó sai katak aban transporte no ema labele halo movimentu maibé jornalista la konfirma ho parte relevante hanesan Governu inklui ho polísia nia komandu atu justifika informasaun ne’e loos ba komunidade.

Informasaun hotu ne’ebé jornalista sira fó sai ne’e loos maibé fonte ne’ebé jornalista hili ne’e mak laiha kompeténsia atu ko’alia asuntu refere.

Nia infroma, durante ne’e CI halo analize ba kualidade jornalista sira-nian ne’e foka liu ba mídia ne’ebé durante ne’e rejistu ona iha CI, no analize ne’e la’ós ba mídia hotu maibé foka ba produsaun notísia mídia nian ne’ebé destake iha mídia sosiál no públiku hatama keisa ba CI tantu pesoál, instituisaun ka Governu.

“Ho rezultadu sira-ne’e mak ami halo konkluzaun katak kapasidade monu la’ós tanba kapasidade jornalista nian maibé monu tanba kapasidade intelektuál jornalista sira-nian. Ida-ne’e ita bele dehan iha situasaun balun ita bele komprende tanba iha fatór rua. Ida mak ita-nia mídia sira hanesan TATOLI, RTTL no GMN, mídia sira-ne’e iha kondisaun ne’ebé di’ak liu tanba remunerasaun ba ema estabilidade salariál di’ak liu kompara ho jornalista sira ne’ebé servisu mídia privada sira,” nia dehan.

Prezidente CI afirma, ba jornalista sira-ne’ebé haknaar-aan iha mídia privada sira, kestaun salariu ne’e mós sai dezafiu ba determinasaun ba kualidade tanba mídia na’in labele selu osan boot, entaun ema ne’ebé hasai estudu lisensimentu ne’e lakohi tanba ho saláriu ne’ebé ki’ik.

“Fatór rua mak ita jornalista mós tenke esforsu atu apresia ita-nia kualidade no kapasidade krítika atu hatene dahuluk mak hadomi ita-nia profisaun, tanba ita hadomi entaun ita tenke esforsu presiza hadi’a sala. La’ós jornalista la sala, sala ne’e sempre iha, maibé tenke husu deskulpa lalais,” Virgílio hateten.

Kualidade liberdade di’ak

Prezidente Conselho de Imprensa ne’e hatutan, ko’alia kona-ba liberdade imprensa iha Timor-Leste (TL) ne’e kualidade Liberdade di’ak iha ASEAN maibé seidauk iha kualidade imprensa.

“Buat ne’ebé CI haree mak kualidade. Agora ita Timor-Leste hakarak halo reflesaun mak ita tenke reflete ba kualidade informasaun mak liberdade Timor-Leste iha kualidade ona no imprensa ne’e iha kualidade ka lae tanba ne’e mak ita presiza kualidade imprensa,” nia dehan.

Infelizmente, hosi tinan 2017, CI haree no halo avaliasaun ne’e kualidade monu. Aspeitu simples ne’ebé mak CI bele haree hosi 2017 tesik mai ne’e, jornalista Timor ne’e polarizadu bazea ba grupu ba politíku iha mídia ka jornalista sira-ne’ebé notísia barak liu tuir grupu politíku ne’ebé mak nia besik ba, depois fonte ne’ebé mak jornalista sira gosta la’ós fonte ne’ebé mak públiku presiza.

Tanba, nia dehan, jornalista balun iha produtu ne’e nia objetivu la’os atu enkoraja públiku atu hatene no halo tuir regra hosi Ministériu Saúde (MS) ho Organizasaun Mundiál Saúde (OMS) nian maibé dalaruma produtu balun hatudu katak públiku atu la fiar COVID-19 ne’e iha Timor-Leste.

“Ita guia ita-nia fonte dezakredita ita-nia entidade sira-ne’e, la’ós labele. Bele, maibé ikus mai tenke konfirma ho Governu, nune’e iha balansu informasaun. Se parte ida de’it mak públiku la fiar no hateten katak COVID-19 ne’e bosok no polítika de’it, tanba ne’e presiza konfirma parte rua hotu,” nia fó hanoin.

Notísia Relevante: CI husu MAPKOMS promove ba instituisaun seluk atu utiliza direitu resposta

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here