Prezidente Conselho de Imprensa, Virgilio Guterres. Imajen/Dokumentasaun Tatoli.

DILI, 23 abríl 2021 (TATOLI)—Prezidente Conselho de Imprensa (CI), Virgílio da Silva Guterres, informa iha trimestre dahuluk ne’e CI halo monitorizasaun ba produtu jornalístika no halo analize ba konteudu notísia sira-ne’e, foku liu ba profisionalizmu no mós kapasidade intelektuál jornalista sira-nian oinsá halo kobertura no hakerek notísia.

Virgílio da Silva Guterres hateten, bazea ba rezultadu analize ne’e mak CI sei hamutuk ho asosiasaun jornalista sira sei dezenvolve kapasidade téknika, kapasidade profisionál no kapasidade intelektual jornalista sira-nian tanba CI nota katak kualidade jornalizmu iha Timor-Leste agora ne’e monu makaas.  

“Buat ne’ebé Conselho de Imprensa tau matan ne’e mak performa profisionál no kapasidade profisionál. Performa profisionál ida mak kumpre ka lae jornalista sira-ne’e hakerek sira-nia notísia tuir padraun kódigu étika jornalístika no prinsipiu jornalizmu ninian. Hosi rezultadu ne’ebé ami hetan durante trimestre primeiru ne’e, ami nota katak kualidade jornalizmu Timor ninian ne’e monu makaas dezde referendu (1999) tesik mai ne’e,” Virgílio da Silva Guterres hateten liuhosi konferénsia imprensa hodi aprezenta balánsu rezultadu monitorizasaun ba produtu jornalístika primeiru trimestre, ne’ebé hala’o iha salaun CI, Quintal Boot, Dili, sesta ne’e.

Kualidade jornalizmu Timor ninian monu tanba kapasidade intelektuál liuliu kapasidade atu intende asuntu ida-ne’ebé mak jornalista sira atu kobre. Ezemplu, tuir nia, jornalista sira hakerek kona-ba propagasaun COVID-19 nian, tenke iha kapasidade atu intende vírus ne’e saida no prosesu transmisaun ne’e oinsá, atu nune’e ninia intendementu ne’e obriga nia atu elabora pergunta ne’ebé atu husu ba fonte.

“Jornalista tenke intende katak bainhira atu halo kobertura kona-ba COVID-19 ne’e asuntu ne’ebé relasiona ho saúde, entaun ninia fonte ne’e barak liu mak pesoál saúde (médiku) la’ós husu komentáriu ba polítiku sira. Notísia barak hosi jornalista ninian durante halo kobertuta kona-ba propagasaun COVID-19 nian, fonte barak jornalista ninian laiha kompeténsia atu fó opiniaun tanba maiória fonte polítika,” Virgílio hateten.

Tanba, nia esplika, fonte hosi polítiku sira laiha kompeténsia atu hatán kona-ba asuntu saúde nian maibé sira iha kompeténsia mak oinsá foti desizaun polítika atu foti medida prevensaun ba COVID-19 nian, maibé sira labele ko’alia kona-bá oinsá vírus ne’e da’et no ninia kapasidade oho ema ne’e oinsá.

Razasun seluk, nia dehan, kona-ba kalamidade klimátika ninian ne’ebé Conselho de Imprensa nota katak mídia barak iha Timor-Leste ne’e balun fó sai kona-ba previsão do tempo (prakiraan cuaca) maibé la buka atu aprofunda hodi alerta antesipadamente ba públiku kona-ba siclone seroja ne’ebé atu mosu no populasaun bele prepara aan maibé jornalista sira la halo misaun ida-ne’e.

“Iha 28 marsu, iha avizu hosi fonte mai-hosi Dirasaun Nasionál Metórolojia no Jeofizika informa katak iha semana ikus marsu nian no primeira semana abril nian sei iha katástrofe iha rejiaun ita-nian. Maibé laiha notisia ida-ne’ebé mak fó sai. La’ós obrigasaun jornalista atu buka tuir maibé informasaun ne’ebé kona-ba ameasa ba públiku ne’e, jornalista iha responsabilidade atu alerta,” nia dehan.

Tuir nia, kapasidade intelektual jornalista ida-nian ne’e determinante tebe-tebes entaun jornalista tenke intende didi’ak asuntu kobertura. Atu eleva kapasidade ne’e, nia husu ba editór no xefe redasaun sira tenke halo balansu no matan moris molok notísia ida atu públika para labele dezakredita ema ka instituisaun ruma.

“Dala ida tán, jornalista sira, ita bele dezmente faktu. Faktu sira-ne’ebé la loos ita bele uza faktu sira atu dezmente. Maibé, ita labele guia ita-nia fonte atu dezakredita ema ruma ka dezakredita instituisaun Governu nian liuliu evita guided-question,” Virgílio hateten.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here