Ilustrasaun COVID-19. Imajen/Espesiál

DILI, 02 maiu 2021 (TATOLI)— Fernando do Rego, ho idade 28, hetan asidente tránzitu Kuartél Jenerál FALINTIL-Forsa Defeza Timor-Leste (F-FDTL) nia oin, iha tersa ( 27/04), ne’ebé bainhira família lori ba Hospital Nacional Guido Valadares (HNGV) hodi halo check up, deteta iha trauma iha ulun.

Tuir nota ne’ebé Agência TATOLI asesu hosi Sala Situasaun-Sentru Integradu Jestaun Krize (SS-CIGC, sigla portugés), iha loron 29 abríl 2021, Fernando do Rego tama iha Departamentu Emerjénsia HNGV ho nível konsiénsia reduzida.

“Iha ezame diagnóstiku ho CT scan hatudu Difuse Axional Injury & Edema Cerebri ka sindrome klínika ne’ebé mosu hafoin trauma ho sinál diminuisaun konsiénsia iha oras balun nia laran, ne’ebé rezulta hosi trauma iha ulun hafoin hetan asidente iha loron hirak liubá no bazeia ba teste PCR hatudu rezultadu pozitivu,” Koordenadór Forsa-Tarefa ba Prevensaun no Mitigasaun Surtu COVID-19, Rui Maria de Araújo, esplika liuhosi nota imprensa, domingu ne’e.

Notísia relevante: Mate-isin Fernando do Rego haloot iha Uatulari tuir protokolu COVID-19

Hafoin deteta pozitivu, ekipa konjunta saúde muda pasiente hosi HNGV bá sentru izolamentu iha Vera Cruz, ne’ebé hosi loron 29 abríl kalan to’o ohin dadeer, hetan tratamentu tuir prosedimentu ba ‘Severe Head Injury’ ka trauma iha ulun.

“Pasiente muda ba iha fatin izolamentu Vera Cruz, atu prevene labele da’et tutan vírus SARS-CoV-2 ba pasiente sira seluk iha HNGV,” Koordenadór Forsa-Tarefa esplika.

Hafoin hakotu Fernando do Reho hakotu iis, halo teste PCR post-mortem no nafatin hatudu pozitivu SARS-COV-2.

Ho nune’e, kazu óbitu COVID-19 iha Timor-Leste to’o agora rejista ona haat.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here