Ilustrasaun ema hakotu iis. Imajen/Espesiál

DILI, 02 maiu 2021(TATOLI)—Família matebian Fernando do Rego deside haloot mate-isin iha moris fatin postu administrativu Uatulari, munisípiu Viqueque, tuir protokolu COVID-19.

Antes ne’e, parte família halo ona enkontru ho parte Sala Situasaun-Sentru Integradu Jestaun Krize (SS-CIGC, sigla portugés) no pilár sira hosi Ministériu Saúde, kona-ba haloot mate-isin.

Tuir informasaun ne’ebé Agência TATOLI rekolla hosi Ministériu Saúde, prosesu funebre sei realiza aban, segunda (03/05), ne’ebé sai hosi fatin izolamentu Vera Cruz, sei tau iha meza iha rezidénsia matebian, iha Quintal-boot durante minutu balun hafoin lori ba suku Macadique, Uatulari hodi haloot.

Antes ne’e, Fernando do Rego hetan asidente tráfegu iha área Fatuhada, iha Kuartél Jenerál FALINTIL-Forsa Defeza Timor-Leste (F-FDTL) nia oin, iha tersa ( 27/04), hodi rezulta kanek iha ain no liman, maibé hela de’it iha uma.

Iha kuarta (28/04), tanba matebian sente ulun moras, família deside lori ba Hospital Nacional Guido Valadares (HNGV) hodi halo check up.

Iha prosesu, doutór identifika matebian nia ulun nakfera, tanba ne’e pesoál saúde sira halo teste swab no hafoin hasai rezultadu hatudu katak Fernando do Rego pozitivu COVID-19, tanba ne’e ekipa Forsa-Tarefa transporta kedan ba sala izolamentu iha Vera Cruz.

Nune’e, iha domingu ne’e (02/05) maizumenus tuku hitu dadeer, Fernando do Rego hakotu iis.

Matebian Fernando do Rego mate ho idade 28 no husik nia kaben no oan na’in-haat.

Ba kestaun ne’e, Jornalista tenta konfirma ho parte família maibé lakohi fó komentáriu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here