PNTL Munisípiu Dili detein suspeitu pasiente COVID-19 na’in-haat ne’ebé halo agresaun fízika hasoru profisionál saúde iha Sentru Izolamentu Tasi-tolu, Dili. ImajenTatoli/Eugénio Pereira.

DILI, 30 abríl 2021 (TATOLI)—Polísia Nasionál Timor Leste (PNTL) Munisípiu Dili, detein ona suspeitu na’in-haat hanesan mós pasiente COVID-19, ne’ebé halo agresaun fízika hasouru profisionál saúde, iha sentru izolamentu Tasi-tolu, Dili.

Komandante PNTL Munisipiu Dili, Superintendente Xefe, Henrique da Costa, esplika, iha 16 abríl 2021 tuku 13:30 otl, mosu insidente obstrusaun ba autoridade públika, hosi suspeitu na’in-haat ho naran inisiál JMA, MDSP, MCDA no DDAM, nu’udár pasiente COVID-19 ne’ebé hala’o tratamentu saúde iha izolamentu Tasi-tolu, halo agresaun fízika hasoru lezadu nu’udár médiku no mós Xefe Saúde Izolamentu ho naran HCDI.

Notísia relevante:Hakanek médiku, PNTL sei prosesa suspeitu bainhira rekopera hosi COVID-19

Insidente ne’e mosu kauza hosi problema tékniku kiik ida, kona-bá enerjia eletrisidade fraku, hodi fó impaktu ba ahi eletrisidade lakan la normál no bee menus, tanba mákina sanyo supa bee labele traballa durante loron rua.

Ho problema ne’e, suspeitu na’in-haat sai hosi sira-nia fatin izolamentu ba halo protestu hosouru Xefe izolamentu ne’e, iha nia-serbisu fatin to’o halo agresaun fízika hanesan tuku lezadu nia rentos to’o bubu.

Iha minutu balun, ekipa investigadór hosi Sub Sesaun Investigasaun Eskuadra Dom Aleixo ba kedan iha fatin akontesimentu, hodi halo investigasaun no detein kedan suspeitu na’in-rua ho inisiál, JMA, MDSP, ekuantu suspeitu na’in-rua MCDA ho DDAM seidauk bele halo detensaun, tanba kondisaun sei sofre COVID-19 no ekipa sei hein to’o médiku-sira halo teste.

“Liu loron balun, médiku-sira fó-sai rezultadu teste negativu no parte saúde entrega mós provas teste negativu ne’e ba suspeitu,” nia esplika.

Iha altura ne’ebá, polisia mós lori kedan suspeitu na’in-rua JMA, MDSP ba detein iha Sentru Detensaun Munisípiu Dili, hodi submete ba prosesu iha tribunál ho númeru prosesu NUC:0187/21.DICMR.

Liu tiha oras 18, Ministériu Públiku hasai despaixu libertasaun ba arguidu JMA no MDSP. Nune’e, iha 26 abríl 2021, Tribunál Distritál Dili hasai mandadu detensaun ba arguidu na’in-haat, JMA, MDSP, MCDA no DDAM hodi kontinua submete fali ba prosesu investigasaun.

PNTL Dili halo ona detensaun ba arguidu na’in-haat ho númeru prosesu NUC:0187/21.DICMR iha 29/04/21 hodi hein aprezenta primeiru interogatóriu iha Tribunál Distritál Dili (TDD).

Iha oportunidade ne’e, Komandante PNTL Dili, Superintendente Xefe, Henrique da Costa husu pasiente  ne’ebé hala’o tratamentu saúde iha sala izolamentu no kuarentena atu kumpre regra importante sira hosi Organizasaun Mundiál Saúde (OMS) no Ministériu Saúde (MS), nune’e bele rekopera lalais hodi fila-fali ba hamutuk ho família.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here