Médiku ne’ebé kanek iha kuarentena Polo, Covalima, segunda (19/04/21). Imajen/facebook.

DILI, 20 abríl 2021 (TATOLI)—Polísia Nasionál Timor-Leste (PNTL) liu hosi Komandu Munisípiu Covalima, sei prosesa suspeitu na’in-rua ne’ebé hakanek médiku ida iha kuarentena Polo, bainhira rekopera hosi COVID-19.

“Asaun ne’e krime. Tanba ne’e, bainhira sira kumpre tiha izolamentu ita sei loke prosesu tuir lei ne’ebé mak vigora,’’ Komandante PNTL Munisípiu Covalima, Superitendente Polísia, António Maria de Sá, hateten ba jornalista Agência Tatoli via telefónika, tersa ne’e.

Notísia relevante:Pasiente COVID-19 hakanek médiku ida iha kuarentena Polo

PNTL sei aplika detensaun oras 72 ba suspeitu na’in-rua tanba kazu krime ne’e flagrante delito, hafoin submete ba Ministériu Públiku (MP), nu’udár na’in ba asaun penál hodi loke prosesu ba iha Tribunál primeira instánsia.

“Parte vítima hato’o ona keixa formál ba polísia,” Superitendente Polísia, António Maria de Sá, informa.

António Maria de Sá husu ema hotu-hotu atu kolobora ho ekipa liña frente, nune’e kontribui ba luta kontra COVID-19.

Entretantu, iha 19 abríl, pasiente COVID-19 na’in-rua iha kuarentena Polo, Munisípiu Covalima, lakohi koopera ho ekipa médiku atu submete ba izolamentu, to’o hakanek médiku ida iha parte oin suku pontu rua.

Oras ne’e daudaun, pasiente na’in-rua ne’e kumpre hela regra vizilánsia iha izolamentu, hodi hetan asisténsia médika.

Notísia relevante:Pesoál saúde HNGV kondena asaun krimi iha Covalima

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here