Diretór Centru Formasaun Profisionál Don Bosco Comoro (CFP-DBC), Adriano Maria de Jesus, SDB. Imajen TATOLI/Domingos Piedade Freitas.

DILI, 30 abríl 2021 (TATOLI)-Centro Formação Profisionál Don Bosco Comoro (CFP-DBC) ho inisiativa harii uma provizóriu iha Don Bosco ba vítima dezastre uma-kain 16 ne’ebé daudaun ne’e sei hela sentru evakuasaun Don Bosco Comoro, Dili.

Notísia Relevante : Labarik 250 hela iha sentru evakuasaun Don Bosco Comoro

Irmaun Adriano Maria de Jesus, SDB hateten, Don Bosco harii uma provizóriu ba vítima sira-ne’e tanba vítima sira lakohi ba fatin ne’ebé Governu deside ho razaun tanba fatin la seguru, nune’e Don Bosco harii uma provizóriu ba sira atu hela atu sira labele toba demais iha simente leten tanba fó impaktu ba saúde.

“Hahú hosi inísiu inundasaun iha loron 04 abríl to’o agora 30 abríl 2021, uma-kain hamutuk 140 resin mak fila ona ba sira-nia hela fatin, no uma-kain ne’ebé sei hela iha Sentru evakuasaun Don Bosco Comoro hamutuk uma-kain 42. Maibé hosi uma-kain 42 ne’e uma-kain 16 sei kontinua hela nafatin Don Bosco no uma-kain 26 Governu iha ona planu atu muda  ba Eskola 30 de Agusto Comoro, Dili,” Irmaun Adriano Maria de Jesus informa ba Agência Tatoli iha knaar fatin Sentru Formasaun Professional Don Bosco Comoro, Dili, sesta ne’e.

Irmaun Adriano de Jesus hatutan, uma-kain 42 ne’ebé deside hela nafatin Don Bosco razaun tanba sira-nia uma mota lori, uma rai monu hanehan no uma balu to’o agora bee sei sa’e, ho ida ne’e mak uma-kain hirak ne’e seidauk fila ba sira nia hela fatin.

Haree ba vítima sira-nia kondisaun hela nafatin iha sentru evakuasaun tuir nia, Don Bosco koordena ho Governu mak  posivel lori vítima sira ba fatin ne’ebé dignu uitoan, entaun parte Governu nian indika fatin mak eskola 30 de Agostu, Comoro, no ko’alia sira atu muda ba, maibé realidade Governu la prepara eskola refere.

Nia akresenta hosi parte Governu nian Diretór Jerál Protesaun Sivíl ba hasoru ona vítima sira no hato’o kestaun lubuk ida, kona ba ahi, seguransa, saneamentu no bee-moos, maibé komunidade barak mak preokupa liubá seguransa tanba sira rasik hatene katak eskola 30 de Agusto fatin problema la seguru ba sira.

“Governu rasik ba haree diretamente kondisaun eskola, no enkontru ikus, Governu deside atu lori vítima uma-kain 26 ba eskola 30 de Agusto, Comoro, iha sábadu semana kotuk, atu muda, maibé la realiza to’o agora, entaun vítima sira daudaun ne’e sei kontinua hela nafatin Don Bosco,” nia dehan.

Uma-kain 12 ne’ebé deside kontinua hela iha sentru evakuasaun Don Bosco, hosi parte Governu husu sira atu halo deklarasaun, entaun uma-kain hirak ne’ebé sei hela halo ona deklarasaun no inisiativa hosi padre sira halo ona tenda hanesan uma provizóriu atu sira bele hela.

Nia hatutan, uma provizóriu ne’ebé daudaun ne’e sira halo orsamentu la’ós apoiu hosi Governu maibé orsamentu ne’e hetan hosi Salezianu Office Mission hosi Austrália, Salezianu Sessional Workers sira, Timoroan-sira ne’ebé hela iha Austrália no antigu alunu Don Bosco nian, inklui mós grupu sessional Workers sira.

“Orsamentu ne’ebé ita hetan harii uma provizóriu ne’e hamutuk $20.000, uma nia medida naruk 30 metru, luan 12 metru no kada família sei hetan kuartu ida medida ho 6X3,” nia esplika.

Hahán ne’ebé daudaun ne’e vítima sira konsumu, nia dehan, balun hosi família, balun hetan ajuda hosi ema oioin no grupu no hosi Don Bosco rasik sosa hahán no fó hahán ba sira.

Jornalista       : Arminda Fonseca 

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here