Membru Polísia Unidade Tránzitu Dili, kontinua pasa revista ba transporte públiku iha Dili, tersa (27/04/21). Imajen Tatoli/Eugénio Pereira.

DILI, 27 abríl 2021 (TATOLI)—Polísia Nasionál Timor Leste (PNTL) liu hosi Polísia Unidade Tránzitu Munisípiu Díli, kontinua halo kontrolu ba transporte públiku, atu uza máskara iha movimentasaun, nune’e prevene transmisaun COVID-19, ne’ebé oras ne’e númeru pozitivu aumenta makaas.

Iha kontrolu ne’e, Polísia Tránzitu mós halo pasa revista ba dokumentu transporte públiku, hodi implementa órden diretiva Komandu Jerál PNTL.

Notísia relevante:PNTL investiga autór soe bandeira RDTL iha Fatuhada

“Ita halo pasa revista ne’e atu husu ba ita-nia sidadaun-sira bainhira viajen karik, uza nafatin máskara no kumpre regra Serka Sanitária. Ita mós kontrola transporte ne’ebé laiha dokumentu, ita halo apreensaun tuir lei kódigu estrada,” Komandante Polísia Unidade Tránzitu Dili, Inspetór Domingos Sarmento Gama, hateten ba Agênsia Tatoli iha Caicoli, tersa ne’e.

Domingos Gama fó hanoin ba sidadaun hotu katak, kapitál Dili implementa hela serka sanitária, tanba ne’e husu ba públiku labele halimar hodi halo movimentu ho livre tanba, bainhira la kumpre regra protokolu saúde, autoridade polísia sei halo atuasaun tuir lei.

“Ita iha hela serka sanitária, maibé movimentu transporte sa’e makaas loos. Tanba ne’e, ita halo kontrolu no apela ba ita-nia kondutór sira atu kumpre nafatin lei kódigu estrada,” nia esklarese.

Iha pasa revista ne’e, polísia halo mós apreensaun ba motorizada balun ne’ebé laiha dokumentu hanesan karta kondusaun no seluk tan, no sei selu multa ba estadu tuir lei kódigu Estrada.

Área ne’ebé PNTL halo pasa revista mak  hanesan Comoro, Becora, Portu-Dili, Lecidere, Komandu Jerál PNTL Caicoli, Colmera no seluk tan.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here