Tribunál Distritál Dili. Imajen/Dok.Tribunais.tl

DILI 29 abríl 2021 (TATOLI)—Jurista Timoroan, Sérgio Quintas, sujere ba Prokuradór Jerál Repúblika (PJR) foun, Alfonso Lopez, atu orienta majistradu Ministéiru Públiku (MP) bainhira halo inkéritu ba prosesu kazu-ruma ho rigorozu liu-tan.

“PJR foun presiza orienta ajente majistradu MP, bainhira invoka inkéritu ho maneira rigorozu liu-tan, hodi deskobre maneira prova ne’ebé adekuadu no proporsionál atu sustenta sira-nia akuzasaun iha Tribunál,” Sérgio Quintas hateten ba jornalista Agência Tatoli iha edifísiu Tribunál Distritál Dili (TDD), kinta ne’e.

Notísia relevante:PJR konklui investigasaun krime korrupsaun no organizadu 197

Sérgio Quintas dehan, presiza inkéritu rigorozu tanba dalabarak iha kazu balun ne’ebé MP aprezenta to’o iha Tribunál, prova laiha no Tribunál deside absolve.

“Dalabarak akontese akuzasaun-sira la sustenta hosi prova, nune’e Tribunál absolve. Ida-ne’e ita halo fila-fali serbisu dobru. Bainhira meiu prova la sufisiente atu akuza ema ida, entaun la presiza mai iha Tribunál no arkiva de’it iha Ministéiru Públiku,” nia hateten.

Iha fatin hanesan, Jurista Manuel Tilman, hateten Prezidente Repúblika (PR) halo nomeasaun ba PJR foun rekondúz de’it, tanba antes ne’e nu’udár Adjuntu PJR, ho karreira profissionál no iha esperiénsia atu bele lidera instituisaun ne’e, atu defende interese Estadu nu’udár na’in ba asaun penál.

Prezidente Repúblika (PR), Francisco Guterres ‘Lú-OLo’ liuhosi dekretu Prezidente Repúblika númeru 22/2021, 28 abríl, hafoin rona Governu, tuir artigu 86, alínea k) hosi artigu 133, númeru 3, konstituisaun RDTL, konjuga ho artigu 12, númeru 1, númeru 2 hosi lei númeru 14/2005, 16 setembru, altera hosi lei númeru 11/2011, 28 setembru (Estatutu Ministériu Públiku), dekreta hodi nomeia Alfonso Lopez nu’udár Prokuradór Jerál Repúblika.

Iha kinta ne’e, Alfonso Lopez simu ona pose hosi Xefe Estadu nu’udár Prokuradór Jerál Repúblika (PJR) ba mandatu tinan haat.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here