Membru Polísia Nasionál Timor Leste (PNTL) hala’o seguransa, bainhira Xanana Gusmão, marka prezensa iha edifísiu PJR, Colmera, Dili, segunda (29/03/21). Imajen Tatoli/António Gonçalves.

DILI, 28 abríl 2021 (TATOLI)—Prokuradoria Jerál Repúblika (PJR) liu hosi Gabinete Sentrál Kombate Korrupsaun no Kriminalidade Organizadu, finaliza prosesu investigasaun ba krime korrupsaun no krime organizadu hamutuk 197, durante 2020.

Durante 2020, Gabinete Sentrál atende  prosesu ne’ebé tama  hamutuk 190 no hosi prosesu hirak-ne’e 66 kona-bá krime ne’ebé komete bainhira hala’o knaar públiku, jenerikamente dezignadu hanesan krime korrupsaun no prosesu 124 seluk kona-bá krime ho tipolojia krime organizadu-sira.

Notísia relevante:PJR aprezenta informasaun anuál ikus ba PN

Iha análiza komparadu badak, haree katak, númeru totál hosi prosesu hirak ne’ebé tama iha Gabinete Sentrál iha 2020 iha 190 menus hosi tinan 2019 hamtuk 249 no iha 2020 númeru hosi prosesu findu sira hamutuk 197, menus kompara ho tinan anteriór 219. Maske nune’e, iha kontajen finál, iha diminuisaun ba pendénsia.

“Hosi inkéritu-krime ne’ebé konklui ona hamutuk 197, termina ona ho pronunsiasaun akuzasaun hamutuk 94 no 85 ho despaixu arkivamentu. Interpoin tiha rekursu 12 no 6 hetan resposta ba rekursu ne’ebé hato’o hosi parte arguido-sira,” relatóriu informasaun annuál 2020 hosi PJR, ne’ebé Agência Tatoli asesu, kuarta ne’e.

Durante 2020, majistradu-sira Ministériu Públiku nian ne’ebé serbisu iha Gabinete Sentrál realiza tiha dilijénsia inkéritu hamutuk 187, partisipa iha sesaun julgamentu 401 no audiénsia primeiru interrogatóriu judisiál ba arguidu detidu hamutuk 34.

Gabinete Sentrál Kombate Korrupsaun no kriminalidade organizadu iha inkumbénsia eskluzivu atu dirije inkéritu-sira no ezerse asaun penál kona-bá krime hirak ne’ebé previstu iha Kapítulu II hosi Títulu II Kódigu Penál nian.

Krime hirak-ne’e mak hanesan, krime ne’ebé komete iha ezersísiu funsaun públiku-sira, krime-sira hosi asosiasaun kriminoza, terrorizmu, organizasaun terrorista no finansiamentu terrorizmu, brankeamentu kapitál, tráfiku estupefasiente, tráfiku ema-nian, tráfiku influénsia, falsifikasaun dokumentu públiku-sira, fraude fiskál, kontra bandu no deskamiñu, administrasaun danoza, esplorasaun ilísitu kona-bá jogu-sira, bainhira konsumadu iha sirkunskrisaun judisiál Dili-nian, ka bainhira akontese iha sirkunskrisaun judisiál territóriu nasionál.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here