Komandante Jerál PNTL, Komisáriu Polísia Faustino da Costa ho ekipa, prepara hodi hala’o audiénsia ho Komisaun A Parlamentu Nasionál (PN), kinta (29/04/21). Imajen Tatoli/Eugénio Pereira.

DILI, 29 abríl 2021 (TATOLI)—Komisaun A Parlamentu Nasionál (PN) Asuntu Justisa no Konstitusionais husu ba Governu ho Komandu Jerál Polísia Nasionál Timor Leste (PNTL), atu solusiona kompensasaun ba komunidade afetada, hosi konstrusaun futuru edifísiu PNTL, iha Caicoli.

Prezidente Komisaun A PN, Joaquim dos Santos ‘Boraluli’ husu ne’e, hafoin hala’o audiénsia ho parte  Komandu Jerál PNTL iha Parlamentu Nasionál, kinta ne’e.

Notísia relevante:Uma-kain 11 iha Caicoli hato’o rekomendasaun ba Governu ho PNTL

“Komisaun A sei rekomenda asuntu ne’ebé diskute durante audiénsia ba plenária atu bele buka solusaun,” Joaquim dos Santos ‘Boraluli’ hateten.

Iha fatin hanesan, Komandante Jerál PNTL, Komisáriu Polisia, Faustino da Costa hateten, PNTL hanesan benefisiáriu ba projetu no laiha kompténsia atu deside valór osan ne’ebé sei fó ba vitima-sira, tanba asuntu ne’e kabe ba kompténsia Ministériu Justisa (MJ).

“PNTL ne’e benefisiériu ba projetu. Ministériu Justisa mak iha kompeténsia atu foti desizaun hodi aseita ho valór kompensasaun ne’ebé atu fó ba ita-nia povu,” Komisáriu Faustino da Costa hateten ba jornalista-sira.

Komandu Jerál PNTL mós husu ba populasaun atu labele imdepde projetu ne’e, bainhira projetu ne’e paradu, Governu bele selu multa ba kompañia.

“Bainhira projetu ne’e paradu, Governu bele selu multa ba kompañia, deputadu sira mós husu ona atu projetu ne’e kontinua,” nia husu.

Parte Komandu PNTL mós kontinua koordena ho kompañia Internasionál Shanghai Construction Group Co, Ltd (SCG), hodi kontinua implementa projetu ne’e.

Projetu konstrusaun edifísiu PNTL, lansa fatuk dahuluk iha 10 Janeiru 2020, implementa hosi Kompañia Internasionál Shanghai Construction Group Co, Ltd (SCG) no konsultan PT. Ciriajasa Cipta Mandiri in JV With JKC Consultan Engineering Unipesoal Lda ho valór orsamentu $10,177,638.20.

Iha 09 fevereiru 2021, uma-kain 11 iha Aldeia 01 Sentru ba Unidade, Suku Caicoli, Munisipiu Dili no Organizasaun Rede ba Rai (RbR) husu ba Governu liu hosi Diresaun Nasionál Terras no Propriedade (DNTP) ho PNTL atu deside didi’ak valór indeminizasaun ba vitima-sira ho justu no transparánsia ba públiku.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here