Ekipa Rede ba Rai hamutuk ho komunidade afetadu Suku Caicoli, uma-kain 11 hala’o koerénsia imprensa hodi hato’o rekomendasaun ba governu. Imajen Tatoli/Eugénio Pereira

DILI, 01 fevereiru 2021 (TATOLI)- Komunidade uma-kain 11 ne’ebé afetadu ba konstrusaun edifísiu foun Kuartél  Jerál Polísia Nasionál Timor-Leste (PNTL) aprezenta rekomendasaun neen (6) ba Governu ho Komandu PNTL tau konsiderasaun.

Reprezentante komunidade no portavós Nain ba Rai, Rogério Marçal husu atu Ministériu Justisa liuhosi Diresaun Nasionál Terras no Propriedade (DNTP) no Komandu PNTL tetu no tau konsiderasaun molok muda sai komunidade hodi rai ne’ebé sira okupa tinan barak iha mós sertifikadu ba rai nian.

Notísia Relevante : PNTL notifika uma-kain 11 iha Caicoli tenke muda

Rekomendasaun ne’e mak tuir mai ne’e:

  1. Rekomenda ba Ministériu Justisa atu implementa lei númeru 8/2017 kona-ba  utilidade públiku  no lei númeru 13/2017 kona-ba lei rai nain ba rai, hodi hapara despeju administrative no aktu ilegál sira.
  2. Rekomenda ba Parlamentu Nasionál atu halo xamada ba Ministru Justisa atu halo klarifikasaun kona-ba komunidade nia direitu.
  3. Rekomenda ba Presidente da Repúblika atu tau atensaun ba kazu komunidade uma-kain 11 iha Caicoli.
  4. Rekomenda ba Primeiru Ministru nu’udar mós Ministru Interiór atu hapara despeju administrative tanba viola prinsípiu lei espropriasaun.
  5. Rekomenda ba PNTL liu-liu ba Komandante Jerál PNTL, Komisáriu Polisia Faustino da Costa halo labele halo intervensaun ba servisu DNTP.
  6. Rekomenda ba PDHJ atu halo investigasaun kle’an ba kazu Caicoli
Komunidade no labarik sira kaer pamfletu hodi protesta kona-ba desizaun Governu atu hasai komunidade afetadu uma-kain 11 iha Aldeia 01 Sentru Ba Unidade, Suku Caicoli, Dili. Imajen Tatoli/Eugénio Pereira

Portavós Regerio dehan, sira la kontra planu Governu nian hakarak halo alargamentu ba Kuartél Jerál PNTL, maibé sira husu atu Governu tenke tau konsiderasaun ba problema no rekomendasaun ne’ebé sira hato’o hodi rezolve problema ho di’ak.

“Ami komunidade Suku Caicoli, Aldeia 01 Centru ba Unidade, hakarak hato’o ejijénsia no rekomendasaun hanesan rai nain, ba prosesu tomak, tanba sei hamosu hela insatisfasaun no konfuzaun lubuk ida ba ami komunidade rasik ne’ebé iha tempu badak nia laran sei sai vítima ba planu dezenvolvimentu ne’e rasik,” portavós  ne’e hateten ba jornalista liuhosi konferénsia imprensa iha Caicoli, Dili, segunda ne’e.

Nia dehan, bainhira Governu konkorda ona atu muda sira tenke fó kompensasaun tuir pedidu ne’ebé sira sei hato’o ba Governu.

“Ami hotu konkorda no koopera  husik mamuk ami nian fatin, tanba dezenvolvimentu ne’ebé planeadu ona, maibé tenke la’o tuir prosesu normal ne’ebé maka iha, sistema pagamentu ne’ebé di’ak,” nia hateten.

Komunidade sira mós lamenta durante tinan barak ona, Governu rasik fó karta xamada ba sira, maibé la halo  negosiasaun no la iha solusaun ka konkordánsia ruma kona-ba folin rai, uma on ai-horis (Bein Imovel)

Durante prosesu negosiasaun ne’ebé realiza dala barak ho maneira presaun psikolojia hodi la promove prinsípiu negosiasaun. Nune’e la hamosu akordu ruma entre Governu no povu rai-nain.

Planu projetu ne’e rasik hamosu prezuiju ba komunidade nia rendimentu durante tinan ualu (8). Prosesu levantamentu dadus ninia lalauk hanesan segredu, tanba la iha informasaun no koñesimentu antes hosi DNTP ba komunidade no prosesu ne’e rasik halo bainhira sira hanesan rai no uma nain la iha fatin.

“Ami husu atu hapara espropriasaun ba ami nia propriedade tanba kontra prinsípiu lei espropriasaun iha artigu 8 númeru 3. Notifikasaun despeju administrative hosi Ministériu Justisa/DNTP nu’udar aktu ilegál,” nia afirma tan.

Populasaun hirak ne’e konsidera Ministériu Justisa/DNTP viola Konstituisaun RDTL artigu 54 númeru 1 no 3 no viola lei númeru 13.2017 kona-ba rejime espesiál ba definisaun titulares bein imovel no viola prinsípiu Estadu de direitu  no  prinsípiu luta povu maubere nian.

Iha fatin hanesan, Koordenadór Nasionál Rede ba Rai (RbR), Pedrito Viera dehan sira prepara ona advogadu na’in-rua hodi fó asisténsia legál hodi rezolve disputa rai entre komunidade afetadu no parte Governu.

“Rede ba Rai sei kontinua defende direitu povu nian bainhira ema halo violasaun ba sira-nia direitu hodi buka solusaun rezolve tuir lei,” Pedrito hateten.

Pedrito hatutan, durante tinan-hitu (7) RbR sempre akompaña problema ne’ebé povu sira hasoru, maibé parte Ministériu Justisa/DNTP la tau konsiderasaun sériu atu rezolve problema ne’ebé povu enfrenta.

Iha parte seluk Reprezentante Advogadu, Julio da Silva dehan, karta notifikasaun ne’ebé Governu hato’o ba komunidade la tau konsiderasaun ba problema ne’ebé povu sira hasoru.

“Prosesu negosiasaun halo tiha ona, maibé falla tanba la iha akordu ema afetadu sira ho entidade benefisiáriu hanesan PNTL,” nia esplika.

Nia hatutan, molok Governu atu hasai komunidade sira tenke tau konsiderasaun ejijénsia ne’ebé povu sira hato’o.

Advogadu ne’e hatutan, bainhira Governu la kumpre regra sira ne’e, sira nia parte hamutuk ho vítima sira sei lori prosesu ne’e ba hato’o keixa ba Ministériu Públiku liga ba kazu krime, abuzu podér no viola direitu povu nian ba hela fatin.

To’o notísia ne’e publika, Agência TATOLI halo konfirmasaun ba Sekretáriu Estadu Terras no Propriedade (DNTP), Mário Ximenes no Komandante Jerál PNTL, Komisáriu Faustino da Costa, maibé seidauk bele fó komentáriu ruma.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here