Vasina AstraZeneca ne’ebé uza iha Dili. Imajen Tatoli/António Gonçalves.

DILI, 29 abríl 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 hamutuk 66, rekoperadu 47 no totál kazu ativu 1.123.

“Totál kazu konfirmadu kumulativu sura hosi 21 marsu 2020, hamutuk 2.190. Kazu detetadu ohin 66 iha Dili,’’ Koordenadór Forsa-Tarefa ba Prevensaun no Mitigasaun, Rui Maria de Araújo hateten liu hosi komunikadu, kinta ne’e.

Notísia relevante:COVID-19: pozitivu 76, rekoperadu 45 no ativu 1.014

Hosi totál kazu detetadu foun  ohin  mane 42, feto 24,  sintomátiku na’in 10, asintomátiku 56 (84,8%) hosi kazu hirak-ne’e 31 (46,9%) mak detetadu tanba atu viajen ba Munisípiu ka ba estranjeiru hafoin deteta pozitivu.

Hosi horisehik mai ohin, hamutuk hotu Laboratóriu Nasionál Saúde halo testes PCR 952, ho detalla hanesan tuir-mai, Vijilánsia sentinela 34,  Rastreiu ba kontaktu ka Contact tracing 112, Rastreiu Aleatóriu ka Random Screening 236, Viajen sai hosi serka sanitária Munisipiu Dili 475, Viajen internasionál 33, Follow up iha kuarentena 62.

Tabela evolusaun surtu COVID-19 iha TL hahú 22 fevereiru 2021, tuir klasifikasaun transmisaun OMS, Aileu neen kazu esporádiku, Ainaro 17 kazu esporádiku, Baucau 92 kazu  iha cluster, Bobonaro 16  kazu esporádiku,  Covalima 52 kazu iha cluster, Dili 1.860, totál kazu oras 24 hamutuk 66,  totál kumulativu óbitu tolu.

Atu bele hatene surtu ida ninia evolusaun, no mós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente insidénsia sukat totál kazu foun kada loron pur abitante rihun 100, hatudu risku ne’ebé populasaun iha atu hetan da’et moras ida.

Loron hirak liu-bá publika ona prevelénsia ne’ebé sukat persentajen hosi ema ne’ebé detetadu hetan moras ida, iha populasaun nia le’et, no hatudu problema moras ne’e bo’ot to’o iha ne’ebé.

Hahú ohin, sei publika gráfiku insidénsia iha Munisípiu Dili, hahú fulan marsu 2021 iha aumentu maka’as kazu detetadu iha Dili, no hahú 3 abríl kazu aumenta maka’as liu tan.

Durante loron hitu ikus, media (rata-rata) insidénsia COVID-19 iha Dili kada loron 28,2/abitante rihun 100. Hanesan komparasaun, media insidénsia kada loron iha India 22.5/abitante rihun100, Indonézia ninia media insidénsia kada loron maka 1,9/abitante rihun 100. Brazíl 27,4/abitante rihun100 no EUA 18,1/abitante rihun 100.

Informasaun adisionál, iha 29 abríl 2021, izolamentu Vera Cruz iha kazu detetadu na’in 25. Iha área obstetrisia na’in 12, medisina interna na’in 13, pediatria nai’n-tolu. Sira na’in 12 iha obstetrisia, kategoria moderadu hotu, sira-nia kondisun estável.

Sira na’in 12 iha medisina interna, haat grave, na’in-ualu  moderadu. Hosi grupu grave ida ne’ebé uza ventiladór. Horisehik sirurgiaun Timoroan sira halo tracheostomia iha Vera Cruz hodi bele fasilita nia dada-iis, maski tenki nafatin uza ventiladór. Ninia kondisaun to’o ohin, estável.

Nain-tolu seluk ne’ebé grave, uza oksijéniu ho mask. Kazu tolu pediatria, rua moderadu, na’in-ida grave. Na’in-ida grave uza CPAP, no rua moderadu la uza ona oxijéniu.

Apela ba populasaun iha Dili laran no mós iha Munisípiu-sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-been, ka me’ar, hodi bele hetan atendimentu hosi profisionál saúde-sira.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here