Apoiu emerjénsia ne’ebé oferese hosi SEPS ho CRS ba família 178 iha Suku Wenunuk, Postu Administrativu Metinaro, Munisípiu Dili, kuarta (28/04/21). Imajen/média SEPS.

DILI, 28 abríl 2021 (TATOLI)—Sekretária Estadu Protesaun Sivíl (SEPS) ho Catholic Relief Services (CRS) iha Timor-Leste (TL), oferese apoiu emerjénsia ba família hamutuk 178 iha Suku Wenunuk, Postu Administrativu Metinaro, Munisípiu Dili, ne’ebé afetadu ba inundasaun iha 04 abríl.

Sasán ne’ebé família afetada-sira simu ho pakote, kompostu hosi ai-han hanesan foos, mina bimoli, susu-been, masin-midar, ikan lata, deho, buiskuit, sasán kuziña no mós sasán ijiéne hanesan sabaun, pastadente, máskara ho sira-seluk.

Notísia relevante:Família 6.000 iha Dili hetan ona apoiu emerjénsia hosi SEPS

“Ita serbisu hamutuk ho CRS hodi apoia Governu  atu bele fornese pakote ai-han no la’ós ai-han ba komunidade afetada-sira,’’ SEPS, Joaquim Gusmão hateten ba jornalista-sira iha suku Wenunuk, kuarta ne’e.

Ho apoiu ne’e, Governu ho parseiru CRS iha esperansa katak, bele hakmán família-sira hodi aguenta moris ho temporária.

Tuir dadus hosi Postu Administrativu Metinaro iha família 303 mak afetada ba inundasaun, kompostu hosi suku tolu mak hanesan Sabuli 17, Mantelolao 108 no Wenunuk 178.

“Ita fó apoiu uluk ba família sira iha Wenunuk no iha sesta sei kontinua distribui ba suku rua seluk,’’ nia dehan.

Nune’e mós Country Manajer CRS iha TL, Yane Tamonob Pinto, hateten CRS serbisu hamutuk ho SEPS hodi fó apoiu ne’ebé iha, tuir kbiit atu bele ajuda hodi hamenus familía afetada iha tempu kalamidade.

Iha fatin hanesan, Xefe Suku Wenunuk, Simão Mendoça lori komunidade nia-naran agradese ba apoiu hosi Governu no mós CRS.

Antes ne’e, CRS fó ona apoiu hanesan ba família 200 iha Munisípiu Baucau no família 500 iha Munisípiu Viqueque.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here