Inundasaun ne’ebé akontese iha 04 abríl, área Raikotu, Comoro, Dili. Imajen Tatoli/António Gonçalves.

DILI, 26 abríl 2021 (TATOLI)—Sekretária Estadu Protesaun Sivíl (SEPS), fó ona apoiu emerjénsia ba família 6.000 iha Munisípiu Dili, ne’ebé afetadu ba dezastre naturál iha 04 abríl.

Apoiu emerjénsia ne’e mak hanesan foos, mina bimoli, buiskuit, ikan-lata sardina, susu-been, sasán kuziña ho sira seluk-tan.

Notísia relevante:SEPS apoia ona família 5.323 iha Dili

“Dadus ne’ebé identifika atu hetan apoiu emerjénsia iha Dili númeru aumenta to’o ona rihun 14. Hosi númeru ne’e, to’o 23 abríl ita fó ona apoiu ba família 6.000 no ita kontinua distribui ba sira ne’ebé seidauk hetan,” SEPS, Joaquim Gusmão, hateten ba jornalista Agência Tatoli iha knaar fatin Caicoli, segunda ne’e.

Tuir dadus SEPS, vítima iha Munisípiu-sira iha família hamutuk rihun 15 mak presiza atu hetan apoiu emerjénsia, tanba ne’e ekipa SEPS serbisu hamutuk ho autoridade lokál-sira hodi halo distribuisaun nesesidade bázika ba família hirak-ne’e.

“Inundasaun ne’ebé akontese iha 04 abríl makaas tebes, halo dalan balun kotu. Nune’e, difikulta ekipa atu identifika dadus, maibé agora ita hahú halo distribuisaun ba Munisípiu-sira ho movimentu makaas, fatin izoladu-sira ita transporta ho elikópteru,” nia dehan.

SEPS garante katak, ekipa ne’ebé serbisu hamutuk ho autoridade lokál, sei distribui duni apoiu ne’e to’o família ida-idak tuir dadus ne’ebé iha ona.

Alende apoiu hosi SEPS, oras ne’e daudaun iha mós apoiu solidariedade hosi Organizasaun Naun Governamentál (ONG)-sira, grupu, individu no entidade sira-seluk.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here