Prokuradór Jerál Repúblika, José da Costa Ximenes. Imajen Tatoli/Egas Cristovão

DILI, 27 abríl 2021 (TATOLI)—Prokuradór Jerál Repúblika (PJR), José da Costa Ximenes, aprezenta informasaun anuál ikus ba reprezentante povu sira iha uma fukun Parlamentu Nasionál tanba iha loron 28 abríl ne’e, PJR sei termina nia mandatu.

Notísia Relevante: Iha tempu badak PR Lú Olo nomea PJR foun

“Ha’u hatene katak presiza kuñese liña estratéjiku sira mak sei bele avalia ho justu ba rezultadu sira-ne’ebé alkansa tiha ona, iha ona dadus parseladu sira no por minor liu kona-ba ne’ebé hatudu informasaun sira oioin durante tinan hirak ne’e. Como ohin mandatu ikus, ha’u halo de’it análize ida ba informasaun ida balansu kona-ba  2013, 2017, 2019 no 2021,” José da Costa Ximenes, ko’alia bainhira aprezenta informasaun anuál Parlamentu Nasionál, tersa ne’e.

Prokuradór José da Costa Ximenes define balansu informasaun rua mak ida nu’udar Prokuradór Jerál Repúblika no ida seluk nu’udar Konsellu Superiór Ministériu Públiku nia prezidente, órgaun ne’ebé halo jestaun ba iha Ministériu Públiku.

Prokuradór Jerál Repúblika relata informasaun ba Parlamentu Nasionál bazeia Konstituisaun RDTL artigu 133 alínea 4, katak Prokuradór Jerál Repúblika nian hatán ba Xefe Estadu no halolon informasaun tinan-tinan ba Parlamentu Nasionál.

Iha mandatu dahuluk, José da Costa Ximenes define planu prioridade hamutuk lima mak hanesan; dahuluk produsaun graduál ba kazu pendente, daruak reforsa hodi kombate no kriminalidade organizada, datoluk reforsa ba rekuperasaun ativu sira, dahaat hakle’an no haforsa kooperasaun institusionál no dalima reforsa aprezentasaun judisiáriu Estadu nian.

Iha mandatu daruak, Prokuradór Jerál Repúblika ne’e define liña estratéjika foun sira hanesan, reforsa asaun Ministériu Públiku nian iha sentidu hosi intervensaun ne’ebé kualifikada no proativu nian ba defeza minór sira-ne’ebé iha hela situasaun perigu.

Nune’e mós reforsa asaun Ministériu Públiku nian ba defeza direitu, interese difuzu no koletivu sira, reforsa asaun Ministériu Públiku iha ámbitu informasaun jurídika, asesu ba direitu no justisa.

Nia fundamenta, dazea ba dezempeñu hirak ne’e halo avaliasaun ba rezultadu sira-ne’ebé Ministériu Públiku alkansa durante períodu tomak nian.

Nia fó-sai katak, dezempeñu hirak ne’e bele haree hosi gradusaun graduál ba kazu pendente sira, ne’ebé hahú iha 31 marsu 2013 simu kazu prosesu 5006 no durante tinan haat nia laran simu prosesu totál 15658.

Nune’e, durante tinan haat iha mandatu dahuluk nian movimenta prosesu pelumenus 20664, prosesu ikus iha tinan dahuluk iha 2013-2017 hamutuk prosesu 18423, to’o 31 dezembru 2016 iha kazu pendente 2221.

Nia haktuir, hahú hosi 31 dezembru 2017 iha prosesu kazu 2241 no prosesu entrada iha tinan haat nia laran hosi rihun 15. Iha mandatu daruak nian sa’e ba prosesu kazu 19167, aumenta prosesu pendente ho 2241 ne’ebé husik hela iha mandatu dahuluk nian.

“Totál prosesu durante servisu iha tinan haat pelumenus 21408, prosesu ikus iha segundu mandatu ninian 18876. Prosesu pendente to’o 31 dezembru 2020 iha 2829 maibé to’o 31 marsu 2021, ita iha 2652 prosesu,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here