Abitante Masin-Lidun, uza vero hodi hakat liu Lagoa Tasi-Tolu, domingu (25/04/21). Imajen Tatoli/António Gonçalves.

DILI, 27 abríl 2021 (TATOLI)—Primeiru Ministru (PM), Taur Matan Ruak, orienta ona Ministru Justisa (MJ), Manuel Cárceres da Costa atu halo identifikasaun ba rai Estadu ne’ebé mamuk, atu bele re-aloka vítima dezastre naturál ne’ebé hela iha área risku hanesan mota ninin, foho lolon no Lagoa Tasi-tolu.

“Primeiru Ministru husu atu identifika rai Estadu. Iha posibilidade atu re-aloka maluk-sira ne’ebé afetadu ba inundasaun, liu-liu sira ne’ebé hela iha Lagoa Tasi-tolu, mota ninin no foho lolon ba fatin foun ne’ebé livre hosi ameasa inundasaun iha tempu  tuir-mai,” Manuel Cárceres hateten ba jornalista-sira hafoin enkontru ho Xefe Governu, iha rezidénsia Faról, tersa ne’e.

Notísia relevante:Dadus família afetadu inundasaun iha territóriu Timor-Leste hamutuk 28.734

Kona-bá ne’e, Ministru Justisa sei fó orientasaun ba Diresaun Nasionál Terras no Propriedade (DNTP), atu buka rai mamuk, liu-liu rai Estadu, nune’e bainhira presiza bele atribui.

Nia dehan, Estadu iha rai mamuk ne’ebé lokaliza iha área Hera ho medida ektare 20-resin no sei haree mós iha área Tibar-nian, nune’e bele tama iha planu, bainhira prezisa duni bele re-aloka maluk afetadu-sira hodi hela temporariamente.

Planu ne’e MJ hakarak atu kontribui hodi ajuda mós planu hosi Ministériu Planu Ordenamentu (MPO) ho Ministériu Obra Públika (MOP) kona-bá urbanizasaun.

Tuir dadus provizóriu hosi Diresaun Jerál Dezenvolvimentu Rurál, Ministériu Administrasaun Estatál (MAE), família afetadu inundasaun iha territóriu Timor-Leste hamutuk 28.734.

Hosi númeru ne’e, Munisípiu Dili iha família 25.881, no família afetadu ne’ebé preenxe formuláriu kona-bá uma no sasán estragu iha 40% aat natón, aat de’it ne’e iha 2% no aat totál hamutuk 48%.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here