Abitante iha mota-ibun Ponte Comoro III. Imajen Tatoli/Antonio Goncalves

DILI, 22 abril 2021 (TATOLI)—Governu liuhosi Ministériu Administrasaun Estatál (MAE), kuarta ne’e atualiza informasaun kona-ba dadus família afetadu inundasaun iha territóriu Timor-Leste tomak hamutuk uma kain 28.734.

Notísia Relevante: MAE simu ona dadus provizóriu vítima afetadu inundasaun hamutuk 21.889

“To’o ohin, ita akompañia atualizasaun dadus família afetadu inundasaun hosi munisípiu hotu-hotu hamutuk uma kain 28.734 mak tama gradualmente iha MAE,” Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres, informa ba Agência TATOLI, iha nia knaar fatin, Colmera, Dili, kinta ne’e.

Atualizasaun dadus hosi númeru ne’e, nia hatutan, seidauk finál tanba dadus ne’ebé submete ba Prezidente Autpridade Munisípal Dili no entrega ba MAE ne’e, dalaruma númeru tun no sa’e tanba vítima sira-ne’ebé hela iha sentru evakuasaun iha Dili ne’e balun hahú fila ona no hela iha sira-nia uma.

“Ita ko’alia nune’e tanba iha akontesementu dezastre naturál ne’e ita sentru evakuasaun hamutuk 43 to’o 44. Maibé, daudaun ne’e sentru ne’ebé ativa iha Dili hela 30 tanba vítima família afetadu sira maiória fila ona ba sira-nia uma. Família afetadu balun ne’ebé sei hela iha sentru evakuasaun ne’e tanba uma lakon totál no sasán mós estragu hotu,” nia dehan.

Diretór Dezenvolvimentu Rurál ne’e hatutan, hosi família afetadu ba inundasaun hamutuk uma kain 28.734 ne’e kompostu hosi Dili iha uma kain 25.881, Aileu uma kain 176, Ainaro uma kain 301, Baucau uma kain 90, Bobonaro uma kain 156, Covalima uma kain 120, Ermera uma kain 92, Lautém uma kain 80, Liquiça uma kain 427, Manatuto uma kain 441, Manufahi uma kain 114, Oé-Cusse uma kain 393 no Viqueque iah uma kain 472.

Nia informa, iha Munsípiu Dili família afetadu ne’ebé prenxe formatu ida kona-bá uma no sasán estragu ne’e iha 40% aat natoon, aat de’it ne’e iha 2% no aat totál hamutuk 48%. Entretantu, dadus hosi munisípiu seluk to’o agora seidauk tama tanba sei iha prosesu levantamentu dadus.

“Semana ne’e parte rekolla dadus tenke finaliza ona dadus, nune’e Ministériu Administrasaun Estatál (MAE) konklui no submete ba Sekretáriu Estadu Protesaun Sivíl (SEPS) hodi prosesa no bele hetan apoiu ruma,” nia hateten.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here