Komandu F-FDTL liuhosi Komponente Apoia Serbisu (CAS) Metinaro, harii tenda militár 10 iha área Tasi-Tolu, hodi fó asisténsia ba vítima dezastre naturál. Imajen/F-FDTL.

DILI, 27 abríl 2021 (TATOLI)—Ministru Defeza (MD), Filomeno da Paixão de Jesus hateten, rekrutamentu ba membru foun FALINTIL Forsa Defeza Timor Leste (F-FDTL) na’in 600, sei hala’o iha fulan Agostu, bainhira vasinasaun COVID-19 doze daruak remata.

Kona-bá ne’e, Ministru Defeza informa ona ba Primeiru Ministru (PM), Taur Matan Ruak, tanba presija  kumpre protokolu Organizasaun Mundiál Saúde (OMS), no Ministériu Saúde (MS) hodi evita transmisaun COVID-19.

Notísia relevante:MD aprezenta rekrutamentu F-FDTL no sosa ekipamentu militár

“Primeiru Ministru husu hanoin kona-bá oinsa realizasaun rekrutamentu iha situasaun COVID-19. Ha’u dehan, rekrutamentu hala’o tarde oitoan iha fulan Agostu, hodi hein vasina ne’e hotu, tanba tauk mosu fali cluster foun,” Filomeno da Paixão de Jesus hateten ba jornalista iha rezidénsia Primeiru Ministru, Faról, hafoin enkontru, tersa ne’e.

Durante enkontru ho Primeiru Ministu, Ministru Filomeno informa ba Xefe Governu katak, ekipa tékniku halo ona preparasaun másimu, liuliu kona-bá lojístika hanesan fardamentu, hahán no hela fatin ba membru foun-sira inklui fatin treinamentu.

“Primeiru Ministru hakarak membru foun-sira ne’ebé pasa, tenki vasina. Prosesu rekrutamentu ne’e-rasik ita alista ona desde tinan kotuk, agora sei halo fali revizaun oitoan de’it,” nia haktuir.

Kona-bá lista naran kadete-sira ne’ebé liu, ekipa rekrutamentu konjunta Ministériu Defeza no Komandu F-FDTL mak sei fó-sai.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here