Ministru Defeza, Filomeno Paixão. Imajen/Media PR.

DILI, 25 janeiru 2021 (TATOLI)–Ministru Defeza (MD), Filomeno da Paixão de Jesus, informa ba Prezidente Repúblika (PR), Francisco Guterres Lú Olo kona-ba preparasaun rekrutamentu kandidatu membru F-FDTL na’in-600 inklui prosesu sosa kilat, kilat-musan no farda.

Ministru Filomeno dehan, Orsamentu Jerál  Estadu (OJE) 2021 aprova ona, agora ekipa rekrutamentu konjunta kompostu hosi Ministériu Defeza no Komandu F-FDTL sei uza osan hodi halo preparasaun ba rekrutamentu iha marsu ka abríl tinan ne’e.

Ministru Filomeno aprezenta mós OJE 2021 Ministériu Defeza inklui F-FDTL hamutuk millaun $45 no F-FDTL nian millaun $25.

“Tinan ne’e ita foku liubá rekrutamentu F-FDTL sei halo de’it ba ema na’in-600, tanba ita iha dekulidade osan,” nia informa ba jornalista, iha Palásiu Prezidente Nicolau Lobato, Bairru Pité, Dili.

Nia hatutan, tinan ne’e rekrutamentu tenke hamenus lai, tanba Governu presiza kria kondisaun uma, toba fatin, hahán no lojístika seluk hanesan kilat.

Kona-ba prosesu sosa kilat inklui kilat-musan Governu halo ona prosesu ba sosa direta iha Singapura, maibé tanba krize polítika afeta ba OJE 2019 to’o OJE 2020, halo prosesu hotu pendente to’o agora.

“Kilat no kilat-musan mós ita sosa iha Singapura ho rekomendasaun no espesifikasaun fó rasik hosi F-FDTL, maibé tanba iha 2019 ita book an ladi’ak no tinan 2020 mós ita book an ladi’ak, tanba Governu moris ho orsamentu duo-désimu. Maibé, tinan 2021 ita hatama fali osan atu sosa nafatin kilat-musan no farda,” nia haktuir.

Tuir planu, iha marsu mai ne’e, kompañia lokál ho naran HAKSOLOK ne’ebé manán konkursu ba sosa direta farda iha TP-Sritex Indonézia.

“Kilat-musan no farda sei to’o iha marsu ka abríl 2021,” nia promete.

Filomeno haklaken, ba tinan 2021 to’o 2022, Ministériu Defeza kontinua sosa ekipamentu F-FDTL nian hodi bele apoia servisu defeza bele la’o tuir planu no polítika.

Entretantu, iha enkontru ne’e, Filomeno aprezenta mós ba Xefe Estadu Lú Olo kona-ba implementasaun lei seguransa militár obrigatória sei halo preparasaun tasak didi’ak foin bele implementa.

Ministru ne’e apela ba joven feto-mane atu prepara kondisaun saúde di’ak, fíziku no mentalidade hodibele tuir kompetisaun fízika atu manán sai forsa ida profisionál.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here