Eis Prezidente Repúblika, José Ramos Horta. Imajen TATOLI/Egas Cristóvão

DILI, 27 abríl 2021 (TATOLI)Eis Prezidente Repúblika, José Ramos Horta, sujere ba Governu atu uza nafatin vasina AstraZeneca ba populasuan iha Timor-Leste tuir rekomendasaun Organizasaun Mundiál Saúde (OMS) nian.

“Ha’u ko’alia ho Primeiru-Ministru atu hetan fornesementu vasina barak liu mai Timór iha tempu badak, Primeiru-Ministru halo kontaktu tiha mak ha’u dudu hosi kotuk, maibé ha’u labele fó sai ho rai ne’ebé no ho sé,” Ramos Horta dehan, hafoin hasoru malu ho Primeiru-Ministru, Taur Matan Ruak, iha Rezidénsia Farol, tersa ne’e.

Nia konsidera, vasina AstraZeneca liuhosi sistema COVAX no OMS mak di’ak liu ba Timor-Leste.

“Lalika kahur barak demais ho vasina oin-oin, AstraZeneca prodús hosi sientizta boot Inglaterra no ninia efikásia ho doze daruak bele sa’e liu to’o 80% resin, ne’ebé Austrália mak atu halo fábrika no tuir regra Austrália nian, tanba ne’e ha’u iha konfiansa,” nia subliña.

Notísia relevante: Governu Xina konkorda apoia vasina Sinovac dozes 100.000 ba Timor-Leste

Ramos Horta nota katak durante implementa vasina iha Timor-Leste, ekipa Ministériu Saúde serbisu maka’as tebes hodi vasina populasaun sira.

“Ha’u haree Ministériu Saúde halo vasina di’ak no aselera, kompara ho rai balun. Ha’u iha dadus katak iha Papua Nova Guiné sira konsege vasina ema 200 kada loron, maibé Timór konsege vasina kada loron ema 2.000 resin, ne’e katak Ministériu Saúde iha kapasidade halo vasinasaun no hatudu ba fornesedór sira katak Timór iha kapasidade,” nia akresenta.

Maski nune’e, Horta mós ko’alia ona ho entidade rai balun, kompañia no sientizta atu estuda sira-nia vasina, tratamentu, no oinsá bele hatama vasina iha Timor-Leste.

Sorin seluk, líder nasionál ne’e hateten nia parte respeita ho deklarasaun polítika sira ne’ebé rejeita vasina AstraZeneca, maibé di’ak liu rona autoridade saúde no OMS.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here