Enkontru Primeiru-Ministru, Taur Matan Ruak, ho Embaixadór Xina iha Timor-Leste, Xiao Jianguo, iha Palásiu Governu. Imajen/GPM

DILI, 22 abríl 2021 (TATOLI)Primeiru-Ministru (PM), Taur Matan Ruak, simu audiénsia Embaixadór Xina iha Timor-Leste, Xiao Jianguo, hodi ko’alia kona-ba progresu ikus kooperasaun vasina entre nasaun rua ne’e.

Iha sorumutuk ne’e, Embaixadór hato’o katak Governu Xina konkorda atu fó apoia vasina Sinovav doze 100.000 mai Governu Timor-Leste hodi kombate COVID-19.

“Desde surtu COVID-19 Timor-Leste, Xina sempre hamriik hamutuk no apoia malu mutuamente,” Embaixadór Xina hateten iha Palásiu Governu, kinta ne’e.

Diplomata ne’e konsidera, Timor-Leste nu’udar amigu di’ak iha tempu naruk no konsidera hanesan viziñu no parseiru di’ak, ne’ebé sempre fó apoiu ba prosessu luta independénsia, konstrusaun nasionál no dezenvolvimentu.

“Anunsia ohin marka importánsia progresu kooperasaun bilaterál no espera donasaun ida ne’e bele haforsa abilidade timor-oan kombate COVID-19 no fasilita rekuperasaun ekonómika no inundasaun,” nia akresenta.

Iha sorin seluk, Xefe Governu agradese ba Governu Xina liuhosi Embaixadór.

“Agradese ba apoiu sira hosi povu no Governu Xina durante ne’e, liuliu iha períodu pandemia ne’ebé bele ajuda tebes Governu Timór iha luta kontra surtu ne’e,” PM Taur dehan.

Xina nu’udar país ne’ebé hatutan liman hodi haruka aviaun charter mai Timor-Leste iha prosesu ba kombate pandemia ne’e, bazeia ba pedidu hosi parte Timór, tanba ne’e Governu Xina konkorda bazeia ba pedidu Governu Timor-Leste atu haruka vasina doze 100.000.

Diplomata ne’e salienta, Xina firme fiar ba produsaun vasina COVID-19 di’ak públiku no Xina halo serbisu seriamente hodi hadi’a asesibilidade ba nasaun ne’ebé sei dezenvolve hanesan Timor-Leste.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here