Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira.

DILI, 27 abríl 2021 (TATOLI)—Polísia Nasionál Timor Leste (PNTL) liu hosi komandu Munisípiu Dili, hala’o hela investigasaun ba traballadór Timoroan na’in-ida ho Xineza na’in-ida iha área Fatuhada Dili, ne’ebé tau bandeira nasionál Repúblika Demokrátika Timor-Leste (RDTL) iha plástiku no so’e ba lixu fatin.

Segundu Komandante PNTL Munisipiu Dili, Superintendente Euclides Belo, hateten aktu soe bandeira RDTL ne’ebé akontese iha domingu 25 abríl, konsidera krime, maibé iha prosesu investigasaun nota, autór-sira rekoñese katak, sira soe foer no la hatene bandeira RDTL falun iha laran.

Notísia relevante:Janeiru-abríl PNTL rejista kazu krime 1.016

Euclides Belo  esplika, ekipa halo duni indentifikasaun ba sidadaun na’in-rua, ida Timoroan ho inisiál ADC no ida seluk Xineza ida ne’ebé hanesan mós na’in ba Gouming Mini Market Lda ho inisiál HJ, deskonfia sira soe bandeira RDTL ne’ebé fa’an iha loja ne’e.

“Sira soe iha lixu fatin, maibé la’ós ho intensaun, tanba iha 04 abríl udan boot estraga sasán hotu inklui sira-nia loja. Entaun bandeira RDTL ne’e iha plástiku laran, bee hoban no tahu nakonu, sira hamoos hodi soe ba lixu. Maibé, sira la hatene iha plástiku laran ne’e, iha bandeira RDTL,” Euclides Belo hateten ba jornalista-sira iha Komandu PNTL, Caicoli, tersa ne’e.

Iha identifikasaun ne’e polísia deteta katak, Timoroan ho inisiál ADC ne’e hela iha adeia Zero-1, Suku Fatuhada Dili, serbisu iha Loja Xineza Gouming Mini Market Lda, rekoñese katak, nia mak ba soe duni foer ba lixu fatin, maibé la hatene bandeira RDTL iha laran, tanba sasán ne’ebé nia patraun falun nakonu ho tahu.

PNTL asegura ona bandeira RDTL ne’ebé sidadaun na’in-rua ne’e soe nu’udár evidénsia hodi prosesa kazu ne’e tuir lei.

“Bandeira RDTL ne’e ita asegura ona no sei halo prosesu,” nia subliña.

Antes ne’e, traballadora ida iha loja Xineza Gouming Mini Market Lda, Letígia da Silva informa ba Tatoli via telefónika, rekoñese traballadór Timoroan ida ba soe duni foer ne’ebé ho plástiku boot ida, maibé la hatene bandeira iha plástiku laran.

“Patraun mak haruka duni kolega ne’e atu lori lixu ne’e ba soe, maibé kona-bá atu soe bandeira RDTL laiha intensaun,” nia hateten.

Entretantu, sidadaun na’in-rua ne’ebé polísia halo ona investigasaun ba faze dahuluk, liberta ona hodi fila ba uma, atu hein prosesu investigasaun tuir-mai.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here