Membru PNTL hosi Bataliaun Orden Públika (BOP), hala’o patrullamentu hodi asegura sidadade Dili durante periúdu serka sanitária, (29/03/21). Imajen Tatoli/António Gonçalves.

DILI, 23 abríl 2021 (TATOLI)—Hahú janeiru to’o abríl, Polísia Nasionál Timor-Leste (PNTL) liu hosi departamentu kriminál, rejista kazu krime iha territóriu tomak hamutuk 1.016.

Portavós Komandu Jerál PNTL, Superintendente Xefe, Arnaldo de Araújo, hateten númeru krime ne’ebé Komandu Munisípiu-sira relata durante periúdu reportájen hosi 1 janeiru to’o 20 abríl domina ho kazu agresaun fízika. 

Notísia relevante:PNTL detein abitante 79 ne’ebé dezvia hosi Dili atu ba munisípiu

“Fulan haat nia-laran ita rejista totál kazu 1.016 mai hosi Munisípiu hotu inklui RAEOA,” Arnaldo de Araújo hateten ba jornalista-sira iha Komandu Jerál, PNTL Caicoli, Dili, sesta ne’e.

Hosi totál númeru ne’e, kategoria kazu aas liu mak integridade fízika simples ho totál númeru 370, tuir fali kazu violénsia doméstika ho totál 243  no kazu omesídiu hamutuk 23.

Kazu rejistadu-sira, balun Komandu PNTL Munisípiu prosesa autór krime-sira tuir lei ba Ministériu Públiku (MP), hodi hala’o prosesu jugamentu iha Tribunál, no kazu balun rezolve tuir família entre suspeitu no arguidu-sira.

Komandu Jerál PNTL liu hosi Jestaun Manajementu Insidente (IMS) sei kontinua rekolla dadus krime-sira ne’ebé akontese, hodi bele halo análiza atu buka solusaun liu hosi haforsa seguransa no patrullamentu ba redusaun krime.

Dadus ne’ebé Agência Tatoli asesu hosi portál www.pntl.tl  hatudu, estatístika krime nasionál ho númeru kazu-sira ne’ebé rejista makaas,  tanba povu ka vítima-sira iha konsiénsia atu halo keixa ba PNTL hodi halo atuasaun tuir lei.

Dadus ne’e mós relata katak, iha duni fatór kontribuisaun balun hodi aumentu krime, ezemplu balun ne’ebé afeta ba reportájen krime iha pontu haat mak hanesan, primeiru, iha ona redusaun atuál ba krime.

Segundu, vítima-sira hakarak atu keixa krime-sira ba PNTL ne’ebé kontráriu ho sistema suku.

Terseiru, aumentu patrullamentu PNTL, signifika aumentu oportunidade ba vítima-sira atu keixa ba Polísia.

Kuartu, aumenta Ofisiál Polísia Suku (OPS) bele aumenta oportunidade ba komunidade atu keixa ba polísia, presiza halo peskiza no análiza liután atu responde ezatu ida hodi kontribui fatór sira kona-bá aumentu no redusaun krime.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here