Prokuradór Jerál Repúblika, José da Costa Ximenes. Imajen Tatoli/Dok.

DILI, 27 abríl 2021 (TATOLI)—Prokuradór Jerál Repúblika (PJR) José da Costa Ximenes, fiar katak iha tempu badak Prezidente Repúblika Francisco Guterres ‘Lú Olo’ nomeia PJR foun ba mandatu tinan haat.

Notísia Relevante: Aban, PJR nia mandatu termina

“Ha’u fiar katak Prezidente Repúblika sei nomeia prokuradór karreira hodi troka ha’u. Ha’u fiar no laran-metin. Ha’u fiar katak semana ida-ne’e ita iha prokuradór jerál foun, la’ós ona José Ximenes, ne’ebé sei mai halo dala sanulu di’akliu PJR José Ximenes,” PJR atuál ko’alia bainhira aprezenta informasaun anuál ba Parlamentu Nasionál, tersa ne’e.

PJR José da Costa Ximenes mós fiar katak,  PJR foun sei hatudu nafatin afirmasaun hodi firme iha pozisaun, ne’e mak importante liu.

“Antes semana ida-ne’e termina, ha’u fiar katak iha ona PJR foun,” nia dehan. 

Entretantu, iha fulan-abríl 2013 nomeadu hodi ezerse funsaun nu’udar Prokuradór Jerál Repúblika (PJR) no serimónia pose realiza iha loron 15 abríl 2013, iha Palásiu Prezidensiál Nicolau Lobato hosi Prezidente Repúblika Taur Matan Ruak no loron 28 abríl 2017 re-nomeadu ba tinan haat (4) tán (2017-2021) tanba ne’e aban PJR José da Costa Ximenes termina mandatu.

Tuir Konstituisaun RDTL artigu 133 (Prokuradoria Jerál Repúblika nian) alínea 3 hateten, Prezidente Repúblika mak hatudu Prokuradór Jerál Repúblika nian ba mandatu tinan haat, nu’udar lei hateten.

Alínea 4 hosi artigu 133 ne’e subliña, Prokuradór Jerál Repúblika nian hatán ba Xefe Estadu no halolon informasaun tinan-tinan ba Parlamentu Nasionál.

Nune’e mós alíneia 6 hosi artigu ne’e hatutan, maktulun Prokuradór Jerál Repúblika nian sira hetan nomeasaun, demisaun no ezonerasaun husi Prezidente Repúblika wainhira rona tiha Konsellu Superiór Ministériu Públiku nian.

Iha  konsituisaun RDTL artigu 134 (Konsellu Superiór Ministériu Públiku nian) alínea 2 akresenta, Prokuradór-Jerál Repúblika prezide Konsellu Superiór Ministériu Públiku nian no nia kompozisaun ho vogál hanesan tuirmai ne’e:

  1. a) Ida, Prezidente-Repúblika mak hatudu;
  2. b) Ida, Parlamentu Nasionál mak hili;
  3. c) Ida, Governu mak hatudu;
  4. d) Ida, sei hili hosi majistradu Ministériu Públiku sira-nia leet

Alínea 3 hosi artigu 134 ne’e hateten, lei mak regula Konsellu Superiór Ministériu Públiku nia kompeténsia, organizasaun no funsionamentu.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here