Ofisiál hosi kompañia PAX, dezinfekta karreta Parlamentu Nasionál iha resintu Uma Fukun, hodi prevene COVID-19, (09/03/21). Imajen Tatoli/António Gonçalves.

DILI, 26 abríl 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 hamutuk 52, rekoperadu 18, kazu ativu 1.050.

“Konfirmadu kumulativu sura hosi 21 marsu 2020, hamutuk 1.949. Dadus jerál  ba loron ohin, detetadu 52, kazu 49 iha Dili, Munisípiu seluk tolu,  rekoperadu 18  no totál kazu ativu 1.050,’’ Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten liu hosi komunikadu, segunda ne’e.

Notísia relevante:COVID-19: kazu foun 89, rekuperadu 29 no ativu 1.016

Hosi totál kazu detetadu  foun  ohin  mane 27, feto 25,  ne’ebé 100% asintomátiku, iha 36  (69,2,1%) mak detetadu tanba atu vaijen ba Munisípiu, hafoin detekta pozitivu. Sira-nia hela fatin iha Dili, iha duni cluster sira ne’ebé iha kazu detetadu barak.

Hosi horisehik mai ohin, hamutuk hotu Laboratóriu Nasionál Saúde halo testes PCR 399, ho detalla hanesan tuir mai, Vijilánsia sentinela 12,  Rastreiu ba kontaktu ka Contact tracing sia, Rastreiu Aleatóriu ka Random Screening 65, Viajen sai hosi serka sanitária Munisípiu Dili 220, Viajen internasionál 42, Follow up iha kuarentena 51, Teste follow up ba sira iha fatin izolamentu 59 kompostu hosi  negative 18  ona no  41 sei nafatin pozitivu.

Evolusaun surtu COVID-19 iha Munisípiu Dili, atu bele hatene surtu ida ninia evolusaun, no mós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun kada loron pur  habitants rihun 100, no hatudu risku ne’ebé populasaun iha atu hetan da’et moras ida.

Loron hirak liu bá, publika ona prevelénsia ne’ebé sukat persentajen hosi ema ne’ebé detetadu hetan moras ida, iha populasaun nia le’et, no hatudu problema moras ne’e bo’ot to’o iha ne’ebé.

Hahú ohin sei publika gráfiku insidénsia iha Munisípiu Dili, hahú fulan Marsu 2021 iha aumentu maka’as kazu detetadu iha Dili, hanesan ita hotu hatene ona, no hahú loron 3 fulan abríl kazu aumenta maka’as liu tan.

Durante loron hitu ikus, média (rata-rata) insidénsia COVID-19 iha Dili kada loron 28,2/ abitante rihun 100. Hanesan komparasaun, média insidénsia kada loron iha India 22.5/abitante rihun 100, Indonésia ninia média insidénsia kada loron maka 1,9/abitante rihun 100. Brasil ninian 27,4/ abitante rihun 100 no EUA 18,1/abitante rihun 100.

Informasaun adisionál  Iha loron  26 de Abril de 2021, izolamentu Vera Cruz iha kazu detetadu na’in 20. Iha área obstetrisia na’in hitu, medisina interna na’in 10, pediatria nai’n tolu. Sira na’in hitu iha obstetrisia, kategoria moderadu hotu, sira-nia kondisun estável. Sira na’in 10 iha medisina interna, tolu grave, hitu moderadu. Na’in tolu grave ne’e, ida  uza ventiladór no rekopera di’ak kompara ho loron hirak liu bá, na’in rua seluk uza oksijéniu ho mask.

Kazu tolu pediatria, ida moderadu, na’in rua grave. Na’in rua grave uza CPAP, no ida moderadu uza oxijéniu ho mask.

Hakarak mós informa ba jornalista ho públiku tomak katak laiha diferensa entre aplikasaun medida saúde públika hodi prevene no mitiga surtu COVID -19 entre Dili, ho Munisípiu sira seluk no RAEOA.

Ema ruma sai hosi Dili ba Munisípiu seluk ho RAEOA, maski lori ona rezultadu teste PCR, tanba Dili ninia númeru kazu aumenta maka’as iha fulan rua ikus, autoridade saúde-sira iha Munisípiu-sira seluk no RAEOA, nafatin bele husu atu kuarentena no repete test PCR, bainhira sira avalia katak ema ne’ebé halo viajen ne’e, tama iha kategoria risku atu hada’et tutan moras ba populasaun iha fatin ne’ebá favór haree insidénsia iha Dili, hanesan temi ona iha leten.

Medida hirak ne’e autoridade saúde-sira foti atu Prevene virus SARS-CoV-2 la hada’et tutan maka’as liu tan iha Munsípiu sira no RAEOA ne’ebé, tuir klassifikasaun transmissaun OMS nian, hanesan bele haree iha tabela iha leten, sei nafatin kazu esporádiku, ka kazu iha kluster.

Aproveita mós oportunidade atu informa ba públiku katak liu hosi kanál diplomátiku ne’ebé Timor-Leste iha, autoridade kompetente sira husu ona esklaresimentu bá autoridade-sira iha Malázia, kona-bá razaun loloos repatria hikas Timor-oan na’in 35 ne’ebé halo tránzitu iha Kuala Lumpur, Malázia, ho destinu Inglaterra. Bainhira iha ona esklaresimentu ofisiál hosi autoridade Malázia, maka sei informa mós públiku.

Apela ba populasaun iha Dili laran no mós iha Munisípiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-been, ka me’ar, hodi bele hetan atendimentu hosi profisionál saúde-sira.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here