Kompañia ajudikadu hahú mobiliza ekipamentu pezadu iha estrada Embaixada Japaun oin, iha Praia dos Coqueiros, tersa (20/04). Imajen/MOP

DILI, 20 abríl 2021 (TATOLI)--Governu liuhosi Ministériu Obra Públiku indika ona kompañia Montana Diak atu halo rekuperasaun emerjénsia ba estrada ne’ebé kotu iha Embaixada Japaun nia oin, iha estrada protokolu Praia dos Coqueiros, kauza hosi dezastre naturál foin lalais.

Ministru Obra Públika, Salvador Eugênio Soares dos Reis Pires, orienta ona Diresaun Jerál Obra Públika no Diresaun Nasionál Estrada, Ponte no Kontrolu Cheia atu serbisu hamutuk ho kompañia ajudikadu Montana Diak, hodi hahú halo rekonstrusaun permanente ba estrada.

“Ita indika ona kompañia Montana Diak mak sei ezekuta obra ne’e no hahú ohin loron sira mobiliza ona ekipamentu pezadu atu hahú rekonstrusaun,” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI, iha resintu Parlamentu Nasionál, tersa ne’e.

Notísia relevante: CNA hahú prepara aprovizionamentu rekuperasaun estrada iha Embaixada Japaun oin

Nia dehan, maski Komisaun Nasionál Aprovizionamentu (CNA, sigla portugés) prepara hela aprovizionamentu maibé tanba emerjénsia, kompañia ajudikadu bele hahú serbisu daudaun.

Orsamentu ba projetu rekuperasaun ne’e hamutuk $314.000, ho duransaun konstrusaun fulan ida, hahú abríl to’o maiu tinan ne’e.

Bazeia ba despaisu hosi  Primeiru-Ministru, Taur Matan Ruak, númeru 46/PM/IV/2021 forma ekipa Task Force halo identifikasaun no kuantifikasaun ba estragu infraestrutura iha kapitál Dili no munisípiu sira, ne’ebé hetan estragu tanba inundasaun iha domingu (04/04).

Ekipa Task Force ne’ebé kompostu hosi Ministériu Obra Públika (MOP) ne’e Ajénsia Dezenvolvimentu Nasionál (ADN) prepara estudu no dezeñu, inklui delibera ona iha Konsellu Administrasaun Fundu Infraestrutura (KAFI) iha loron 19 abríl, nune’e MOP hanesan ministériu implementadór ho finansiamentu hosi liña ministeriál.

Nune’e, indikasaun ba kompañia bazeia ba deliberasaun KAFI no ekipa Task Force, ne’ebé nota katak presiza halo servisu emerjénsia tanba nu’udar estrada protokolu atu fasilita movimentu transporte.

“Iha inísiu servisu kompañia ajudikadu, akompaña direta hosi ha’u no tékniku sira hodi orienta kompañia servisu tuir estudu no dezeñu ne’ebé iha,” Diretór João Mário  subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here