Prokuradór Jerál Repúblika (PGR), José da Costa Ximenes. Imajen Tatoli/Egas Cristóvão

DILI, 27 abríl 2021 (TATOLI)–Prokuradór Jerál Repúblika (PJR), Jose da Costa Ximenes, tersa ne’e hasoru malu no enkontru ho Prezidente Repúblika, Francisco Guterres Lú Olo, hodi hato’o ninia gratidaun no agradesimentu ba Xefe Estadu tanba aban (kuarta, 28/04) ninia mandatu nu’udar Prokuradór Jerál Repúblika termina ona.

Notísia Relevante: PJR sei kompleta mandatu tinan haat iha fulan-abríl

“Aban ha’u sei termina hau-nia mandatu hanesan Prokuradór Jerál Repúblika. Purtantu, enkontru ohin ne’e, ida mak foka ba asuntu ida-ne’e (mandatu termina). Ha’u hato’o ha’u-nia gratidaun no agradese ba Prezidente Repúblika ba auto kargu hanesan Prokuradór da Repúblika ba mandatu dahuluk 2013 to’o 2017 no mandatu daruak 2017-2021 to’o agora,” José da Costa Ximenes hateten ba jornalista sira hafoin hala’o enkontru ho Prezidente Repúblika iha Palásiu Prezidensiál Nicolau Lobato, Bairru Pite, Dili.

Nia hatutan, nia simu pose iha 28 abríl 2017 hosi Prezidente Repúblika altura ne’ebá atuál Premeiru-Ministru Taur Matan Ruak, maibé tempu barak liu 2017 to’o 2021 nia hamutuk ho Prezidente Repúblika Francisco Guterres Lu Olo to’o momentu ida-ne’e.

Iha biban ne’e, nia mós hato’o gratidaun no agradesimentu ba apoiu hotu hodi lori nia lidera Prokuradór Jerál Repúblika no Ministériu Públiku besik dékada ida.

“Pesoalmente ha’u agradese tanba hetan oportunidade hodi lidera Ministériu Públiku ho Prokuradór Jerál da Repúblika besik dékada ida ho personalidade ita-nia líder rezisténsia na’in-rua ho personalidade ne’ebé mak diferensa maibé ho sentidu Estadu ne’ebé aas, ne’e mak primeiru,” nia dehan. 

Kestaun daruak, nia mós aproveita oportunidade hodi hato’oo mós ba Prezidente Repúblika kona-ba atividade Prokuradór Jerál ninian ne’ebé mak hala’o iha fulan marsu to’o abríl ne’e.

Nune’e mós, iha reuniaun ida-ne’e nia hato’o moós kona-ba audiénsia ho komisaun A Parlamentu Nasionál kona-ba assuntu finansa publika relativamente konta jerál Estadu nian ba 2019.

Aleinde ne’e, nia haktuir kona-ba audiénsia ho komisaun A Parlamentu Nasionál ne’ebé mak halo iha fulan marsu nia-laran ba audiénsia públika relativamente ho estatutu Ministériu Públiku foun nian no mós ho lei organizasaun judisiál nian.

Prokuradór Jerál Repúblika (PJR), Jose da Costa Ximenes, hasoru malu no enkontru ho Prezidente Repúblika, Francisco Guterres Lú Olo. Imajen/Mídia PR.

Iha biban ne’e, nia mós imforma kona-ba nível prosesuál movimentasaun prosesu marsu hamutuk 2.600-resin no prosesu ida-ne’e kona-ba atividade prosesuál. Aleinde ida-ne’e, iha pontu ikus fó informasaun kona-ba balansu Jerál 2017-2021 nian, saida mak Prokuradór Jerál Repúblika halo ona no saida mak Prokuradór Jerál Repúblika seidauk halo no saida mak kontinua halo ba Prokuradór foun ne’e.

“Importante mak ne’e, ha’u iha mandatu dahuluk ne’e, tau iha prioridade haa. Dahuluk mak redusaun ba kazu pendente, ohin ha’u dehan redús ne’e ita labele haree de’it ba kuantidade maibé ita mós keta haluha ita-nian komunidade presiza justifika no aselera lalais. Labele ita hakarak folin kuantidade ema ida mai kazu simples no ida tenke hein tinan lima para garante kualidade ne’e labele. Ita iha responsabilidade rua iha ita-nia kbaas ne’ebé ita tenke tula. Ida mak seriedade prosesu la’o lalais no ida seluk mak garante kualidade,” nia dehan.

PRJ ne’e hato’o rekomendasaun katak tenke servisu ho ekipa, depois hamutuk lori Ministeru Públiku ba servisu ne’ebé di’ak liután iha sosiedade.

“Ha’u hanoin responsabilidade Prokuradór Jerál Repúblika fó mai ha’u labele adianta.  Prokuradór Jerál Repúblika fó mai sei ko’alia no hato’o nia planu tuir mai ne’e saida ba tinan haat nian,” nia dehan.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here