Vise Primeiru-Ministru Asuntu Solidariedade Sosiál no Inkluzaun, Armanda Berta dos Santos prezide reuniaun evaluasaun kona-ba faze dahuluk ba implementasaun Vasina Ai-moruk AstraZeneca kontra COVID-19 iha Timor-Leste, iha MSSI Caikoli, tersa (27/04). Imajen Tatoli/Egas Cristovão.

DILI, 27 abríl 2021 (TATOLI)—Ekipa interministeriál, tersa ne’e halo evaluasaun ba implementasaun vasina faze dahuluk ba aimoruk AstraZeneca kontra COVID-19 iha Timor-Leste ho objetivu atu bele hatene timor-oan na’in hira mak simu ona vasina ne’e.

Notísia Relevante: Pesoál liña frente 1.080 simu ona vasina AstraZeneca

“Objetivu hosi enkontru ne’e atu halo evaluasaun ba implementasaun vasina AstraZeneca, nune’e atu hatene ema na’’in hira mak simu ona vasina AstraZeneca ne’e iha Timor-Leste,” Vise primeu Ministru no Ministra Solidariedade Sosiál no Inkluzaun (MSSI), Berta dos Santos, hateten ba jornalista sira, iha MSSI, Caicoli, Dili.

Ba ema hirak ne’ebé lakohi simu vasina AstraZeneca ne’e, nia husu ba Ministériu Saúde (MS) atu halo sensibilizasaun ba autoridade no komunidade iha baze, nune’e ema hotu bele komprende kona-ba vasina AstraZeneca ne’e.

Iha fatin hanesan, Ministra Saúde (MS) Odete Maria Freitas Belo informa daudaun ne’e populasaun hamutuk 26.000 mak simu ona vasina AstraZeneca, signifika liu ona 100%  tanba vasina ne’ebé iha vial (frasku vasina nian) ida iha doze 10 ka liu.

“Tanba kada dos ida iha laran doze 10 no balun liu, entaun ne’e signifika katak ita liu ona 100%. Alvu ne’ebé ita atinje ne’e loos hela tanba ita liu tiha 24.000 pesoa ona,” nia hateten.

Ida-ne’e akontese tanba bainhira halo lansamentu iha loron 7 abríl no loron tuir mai ne’e, Ministériu Saúde kontinua halo vasina AstraZeneca maibé iha rezisténsia hosi ema balun ka instituisaun ne’ebé MS identifika alvu prioritáriu no dala ruma sira tauk maibé depois halo sensibilizasaun ne’e, ema barak mak simu vasina AstraZeneca.

Maibé, tuir nia, balansu ba vasina ne’ebé mak iha Ministériu Saúde sei haree ba sira ne’ebé frontline ne’ebé seidauk simu vasina.

Partisipasaun iha enkontru ne’e, Vise Primeiru-Ministru, no Ministra Solidaridade Sosiál no Inkluzaun (MSSI), Berta dos Santos, Ministru Asuntu Parlamentar no Komunikasaun Sosiál (MAPKOMS), Francisco Jerónimo, Ministra Saúde (MS), Odete Maria Freitas Belo, Vise-Ministru Negósiu Estranjeiru no Kooperasaun (MNEK) Julião da Silva, Sekretáriu Estadu Protesaun Sivíl (SEPS) Joaquim Gusmao.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here