Jornalista-sira hosi média nasionál hanesan mós pesoál liña frente partisipa vasina AstraZeneca iha CCD, sesta (16/04/21). Imajen/António Gonçalves.

DILI, 19 abríl 2021 (TATOLI)—Pesoál liña frente hamutuk 1.080 simu ona vasina AstraZeneca, konta hosi loron lansamentu iha 7 to’o 18 abríl, iha nível nasionál.

“Planu vasinasaun, loloos ne’e Munisípiu Dili semana rua de’it. Maibé, ita haree katak to’o horisehik vasina ne’e atinje 1.018 iha nível nasionál. Signifika, iha dozes rihun 14 ne’ebé ita tenki aplika,” Diretora Jerál Prestasaun Serbisu Saúde, Odete Viegas,  hateten ba jornalista-sira iha Palásiu Sínzas, Caicoli, segunda ne’e.

Notísia relevante:Membru PNTL 70% simu ona vasina AstraZeneca

Nia esplika, bainhira konta loloos loron ne’ebé implementa iha Dili ba semana rua, entaun tenke remata iha 21 abríl tuir kalendáriu ne’ebé iha, no Munsípiu-sira mak kontinua tanba sira hahú iha 12 abríl no balun ikus-liu iha 16 abríl.

“Entaun ita tenki la’o tuir planu ne’ebé iha. Ita espera katak, vasina dozes rihun 24 ne’e sei hotu  iha fulan abríl-nia laran,’’ nia dehan.

Estimasaun ba faze da-ruak ne’ebé sei to’o TL iha fulan maiu nia rohan, sira ne’ebé simu ona dozes dahuluk, sei simu tan dozes daruak-nian, nune’e tuir observasaun parte saúde katak, ba ida agora ema atu simu vasina ne’e seidauk másimu.

“Másimu karik, semana rua ne’e ita kompleta ona dozes-sira ne’ebé iha. Maibé, agora ita-nia partisipasaun mak seidauk másimu, tanba dozes rihun 24 ne’e tenki hotu, hodi hein fali  segunda faze,’’ Odete haktuir.

Durante simu vasina, parte saúde nota katak, iha efeitu sekundáriu maibé sente kamán  hanesan isin-manas, matan-dukur,  isin moras hotu, kolen, balun hamlaha no balun moras iha sona fatin.

Signifika, efeitu hosi vasina ne’e iha, maibé kiik liu no importante husu ba ema ne’ebé mak tama iha liña frente tenki hakbesik an ona ba iha fasilidade saúde hahú ohin, to’o bainrua atu nune’e planu vasinasaun  dozes rihun 24 dahuluk bele hotu.

Tuir observasaun parte saúde, to’o oras-ne’e seidauk iha efeitu ruma katak, vasina ne’e halo komplikasaun ba ema-nia moras, tanba bazeia ba referénsia hosi matenek na’in-sira,  vasina ne’e la prejudika  moras-sira ne’e.

“Signifika vasina ne’e seguru hela, hanesan ema tensaun, moras kurasaun to’o agora la afeta buat ida,” subliña.

Tuir Odete, ema ne’ebé vasina ona doze dahuluk, ninia sistema imunidade sa’e ba 74%, bainhira  hetan tan doze daruak iha 11 juñu, imunidade  sei sa’e ba 82 %.

“Maski ita vasina ona, maibé proteje ita-nia an nafatin, tanba ita-nia persentajen seidauk sa’e ba 100%,’’ nia apela.

Tuir planu, to’o 21 abríl tenke vasina hotu, maibé bainhira seidauk hotu, Odete dehan, bele kontinua to’o deit fulan abríl nia rohan tanba vasina sei expire iha fulan maiu.

Tuir dadus hosi Ministériu Saúde, totál pesoál liña frente iha Munisípiu Dili hamutuk 13.000, no iha semana ne’e nia-laran, pesoál liña frente iha Dili hamutuk 5.000 mak simu ona vasina, falta 8.000 mak seidauk simu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here