Pesoál saúde prepara hela ekipamentu hodi halo teste swab iha CCD, tersa (27/04/21). Imajen Tatoli/António Gonçalves.

DILI, 27 abríl 2021(TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 foun hamutuk 99, rekoperadu 76, kazu ativu 1.073.

“Totál kazu konfirmadu kumulativu sura hosi 21 marsu 2020 hamutuk 2.048. Ohin iha kazu 99 ne’ebé 58 iha Dili, Munisípiu seluk 41. Iha mós kazu rekoperadu 76  ho totál kazu ativu 1.073,” Koordenadór Forsa-Tarefa ba Prevensaun no Mitigasaun surtu COVID-19, Rui Maria de Araújo  hateten liu hosi komunikadu, tersa ne’e.

Notísia relevante:COVID-19: kazu foun 52, rekoperadu 18 no ativu 1.050

Totál kazu detetadu foun ohin mane 50, feto 49,  sintomátiku na’in-lima, asintomátiku 94  (94,9%).

Númeru ne’e, iha na’in 71  (71,1%) mak deteta tanba atu vaijen ba Munisípiu hafoin deteta pozitivu no sira-nia hela fatin iha Dili, iha duni cluster sira ne’ebé iha kazu detetadu barak.

Hosi horisehik mai ohin, hamutuk hotu Laboratóriu Nasionál Saúde halo teste PCR 958, ho detalla hanesan tuir-mai, Vijilánsia sentinela 141, Rastreiu ba kontaktu ka Contact tracing 27, Rastreiu Aleatoriu ka Random Screening 198, Viajen sai hosi serka sanitária Munisípiu Dili 568, Viajen internasionál 22, Follow up iha kuarentena rua.

Hosi horisehik mai ohin, teste PCR ne’ebé halo iha Munisípiu-sira seluk totál 312, ho detalla hanesan tuir mai, Maubisse 94,  Maliana 15, Viqueque  46, Suai 84,  Baucau 73, Teste follow up ba sira iha fatin izolamentu 101 ne’ebé rezultadu na’in 76 negativu no 25 sei nafatin pozitivu.

Informasaun adisionál, iha  27 abríl, izolamentu Vera Cruz iha kazu detetadu na’in 22. Iha área obstetrisia na’in-ualu, medisina interna na’in 11, pediatria nai’n-tolu. Sira na’in-ualu iha obstetrisia, kategoria moderadu hotu, sira-nia kondisaun estável.

Sira na’in 11 iha medisina interna, ida grave, 10 moderadu. Na’in ida grave ne’e, ida  uza ventiladór no rekopera di’ak kompara ho loron hirak liu bá, na’in 10 seluk iha kategoria  moderadu  na’in-rua mak uza oxijéniu ho mask. Kazu tolu iha pediatria, rua moderadu no ida grave uza CPAP  no rua moderadu la uza oxijéniu.

SIJK informa katak, laiha diferénsa entre aplikasaun medida saúde públika hodi prevene no mitiga surtu COVID-19 entre Dili, ho Munisípiu sira seluk no RAEOA.

Ema ruma sai hosi Dili ba Munisípiu seluk ho RAEOA, maski lori ona rezultadu teste PCR, tanba Dili ninia númeru kazu aumenta maka’as iha fulan rua ikus, autoridade saúde iha Munisípiu sira seluk no RAEOA, nafatin bele husu atu kuarentena no repete test PCR, bainhira sira avalia katak, ema ne’ebé halo viajen ne’e, tama iha kategoria risku atu hada’et tutan moras ba populasaun iha fatin ne’ebá, favór haree insidénsia iha Dili, hanesan temi ona iha leten.

Apela ba populasaun iha Dili laran no mós iha Munisípiu sira seluk, atu aprezenta-an iha fasilidade saúde públiku ka Sentru Saúde no Ospitál ne’ebé besik, bainhira sente isin-manas, ka kakorok moras, ka inus-been, me’ar, hodi bele hetan atendimentu hosi profisionál saúde sira.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here