Prokuradór Jerál Repúblika (PGR), José da Costa Ximenes. Imajen Tatoli/Egas Cristóvão

DILI, 25 fevereiru 2021 (TATOLI)—Prokuradór Jerál Repúblika (PJR) José da Costa Ximenes sei kompleta mandatu tinan haat (4) iha fulan-abríl, tinan ida-ne’e.

Iha fulan-abríl 2013 nomeadu hodi ezerse funsaun nu’udar Prokuradór Jerál Repúblika (PJR) no serimónia pose realiza iha loron 15 abríl 2013, iha Palásiu Prezidensiál Nicolau Lobato hosi Prezidente Repúblika Taur Matan Ruak no loron 28 abríl 2017 re-nomeadu ba tinan 4 tán (2017-2021).

Prokuradór José da Costa Ximenes hateten, kada tinan Prokuradoria Jerál Repúblika sempre aprezenta informasaun anuál ba Parlamentu Nasionál.

“Tinan ida-ne’e espesiál uitoan, katak kompleta ho mandatu tinan haat iha tinan ida-ne’e. Entaun, ami aproveita ajenda hela iha fulan-abríl nia laran hodi bele aprezenta ona informasaun anuál ba Parlamentu Nasionál,” Prokuradór Jose da Costa Ximenes, informa ba jornalista sira, hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, iha Parlamentu Nasionál, kinta ne’e.

“Agora daudaun informasaun anuál preparadu hotu ona no hein imprime de’it ona. Purtantu provavelmente to’o loron 2 abríl ne’e informasaun anuál ami sei mai hato’o iha uma fukun ida-ne’e,” nia dehan.

Tuir Konstituisaun RDTL artigu 133 (Prokuradoria Jerál Repúblika nian) alínea 3 hateten, Prezidente Repúblika mak hatudu Prokuradór Jerál Repúblika nian ba mandatu tinan haat, nu’udar lei hatete.

Alínea 4 hosi artigu 133 ne’e subliña, Prokuradór Jerál Repúblika nian hatán ba Xefe Estadu no halolon informasaun tinan-tinan ba Parlamentu Nasionál.

Nune’e mós alíneia 6 hosi artigu ne’e hatutan, maktulun Prokuradór Jerál Repúblika nian sira hetan nomeasaun, demisaun no ezonerasaun husi Prezidente Repúblika wainhira rona tiha Konsellu Superiór Ministériu Públiku nian.

Iha  konsituisaun RDTL artigu 134 (Konsellu Superiór Ministériu Públiku nian) alínea 2 akresenta, Prokuradór-Jerál Repúblika prezide Konsellu Superiór Ministériu Públiku nian no nia kompozisaun ho vogál hanesan tuirmai ne’e:

a) Ida, Prezidente-Repúblika mak hatudu;

b) Ida, Parlamentu Nasionál mak hili;

c) Ida, Governu mak hatudu;

d) Ida, sei hili hosi majistradu Ministériu Públiku sira-nia leet.

Alínea 3 hosi artigu 134 ne’e hateten, lei mak regula Konsellu Superiór Ministériu Públiku nia kompeténsia, organizasaun no funsionamentu.

Iha loron 15 abríl 2013 bainhira simu pose hosi Prezidente Repúblika Taur Matan Ruak, Prokuradór José da Costa Ximenes, promete sei sakrifika-aan hodi garantia justisa di’ak ba Timor oan hotu iha país demokrátiku ida-ne’e.

“Ha’u sei promete ba Prezidente Republika katak, sei konta nafatin ho ha’u-nia esperiénsia profisionál no ha’u-nia dedikasaun ba kna’ar ida-ne’e ho ha’u-nia lealidade. Ha’u-nia preokupasaun boot liu mak atu labele lakon konfiansa ne’ebe Prezidente da Republika fó mai ha’u. Depozita mai ha’u atu hala’o kna’ar ida-ne’e, ami konta nafatin Prezidente Repúblika nia apoiu nu’udar ema ida-ne’ebé preokupa ba kestaun justisa, liuliu krime organizadu sira no partikularmente ba fenómenu droga no krime korrupsaun,” Prokuradór Jerál Repúblika José da Costa Ximenes halo promesa iha momentu ne’ebá.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here