Kay Rala Xanana Gusmão bainhira halo entrevista ho jornalista sira iha edifísiu g7+. aredores Palásiu Governu, ohin. Foto António Goncalves

DILI, 26 abríl 2021 (TATOLI)—Prezidente Partidu Congresso Nacional de Reconstrução de Timorense (CNRT), Kay Rala Xanana Gusmão, haktuir uluk Timor-Leste (TL) sai ezemplu sai Guiné-Bissau no nasaun balun iha kontinente Áfrika kona-ba prosesu harii Estadu no Nasaun nune’e sai hosi frazilidade.

Notísia Relevante: Xanana apela ba Timor-oan konsidera COVID-19 nu’udar problema sériu

“Iha CNRT nia ukun sai mós ezemplu ba rai barak iha Áfrika (Guiné-Bissau) no fatin seluk iha mundu tanba ukun-aan tiha maibé la konsege harii Estadu, seidauk konsege harii vizaun ida oinsá bele dezenvovle nasaun. Maibé, ha’u hanesan Prezidente Partidu triste uitoan mak ita sai tiha hosi Estadu frazil, fila-fali ona ba estadu frazil, maibé labuat ida,” Prezidente Partidu CNRT ne’e hato’o nia mensajen polítika ne’e liuhosi konferénsia imprensa iha selebrasaun aniversáriu Partidu CNRT ba dala-14 (26 abríl 2007-2021), iha Bairru dos Grilhos, Dili, segunda ne’e.

Xanana Gusmão hatutan, bainhira CNRT kaer hela ukun fó dalan ba g7+ halibur rai 20, barak mós hakarak tama tán hodi aprende hamutuk.

“Ita la hanorin, ita troka ita-nia hanoin ho ita-nia esperiénsia iha saida mak di’ak no saida mak ladia’k, hodi fó hatene ba malu kona-ba dalan atu harii Estadu no Nasaun,” nia dehan.

Maibé Eis Primeiru Ministru ne’e sente triste tanba oras ne’e Timor-Leste mós enfrenta situasaun hanesan Guiné Bissau iha tempu uluk.

“Ita sai tiha hosi estadu frazil hanesan ezemplu ida iha ita-nia maluk sira iha g7+ maibé ita hakiduk tiha fali, ita agora hatudu ita-nia Estadu sei frazil,” nia afirma.

Xanana ko’alia kestaun ne’e tanba Timor-Leste nia misaun apoia ba prosesu eleitorál iha Guiné-Bissau ne’e, hala’o liuhosi pedidu ida hosi Governu Tranzitóriu Repúblika Guiné-Bissau nian ba Repúblika Demokrátika Timor-Leste iha setembru 2013, ne’ebé, husu apoiu tékniku no finanseiru atu hala’o atividade resensiamentu no eleisaun nian iha país ne’ebé hanesan mós Estadu-Membru g7+ nian.

Iha momentu ne’e Xanana nu’udar Primeiru-Ministru, hatudu Sekretáriu Estadu Desentralizasaun Administrativa, Tomás Cabral, atu koordena Misaun ne’e, ne’ebé hetan apoiu hosi reprezentante órgaun administrasaun eleitorál Timor-Leste nian no Ajénsia Kooperasaun Timor-Leste nian iha Guiné-Bissau.

Misaun Apoiu ba Prosesu Eleitorál iha Guiné-Bissau, ne’ebé kompostu hosi Gabinete Apoiu ida (harii iha Bissau, ne’ebé forma hosi komponente administrasaun, finansa no lojístika nian) no Asesoria Téknika ho Apoiu ba Resenseamentu Eleitorál Timor-Leste nian ida (forma hosi tékniku sira iha Sekretariadu Tékniku Administrasaun Eleitorál Timor-Leste nian, tama mós área informátika no Teknolojia no Formasaun), hodi fó ona apoiu ba instituisaun Guiné-Bissau nian sira, iha prepararasaun no implementasaun ba eleisaun ho susesu.

Ho esperiénsia ne’ebé Timor-Leste hatudu iha Guiné-Bissau, halo nasaun iha Áfrika hakarak hamutuk ho Timor-Leste liuhosi g7+.

Organizasaun intergovernamentál g7+ ne’ebé harii iha tinan 2010, hosi inisiativa Timor-Leste nian. Organizasaun g7+, foufoun, nasaun hitu mak harii no oras ne’e kompostu hosi nasaun 20 hosi Áfrika, Ázia-Pasífiku no Karaíbas no Médiu Oriente.

Nune’e mós Afeganistaun, Burundi, Xade, Komores, Kosta Marfín, Giné, Giné-Bisau, Haiti, Iemen, Illa Salomaun, Libéria, Papua Nova Giné, Repúblika Sentru-Afrikana, Repúblika Demokrátika Kongu, Saun Tomé no Prínsipe, Serra Leoa, Somália, Sudaun Súl, Timor-Leste no Togo.

Totál populasaun hosi nasaun sira-ne’ebé forma organizasaun g7+ hamutuk ema millaun rihun 1,5.

Prezidente organizasaun g7+ iha momentu ne’ebá mak Ministru Planeamentu no Dezenvolvimentu Ekonómiku Serra Leoa nian, Francis Kai Kai, nune’e Forum kona-ba Objetivu sira hosi Dezenvolvimentu Sustentavel 16+ ne’ebé hala’o iha Dili, husi loron 11 to’o loron 14 fulan-novembru tinan 2019, ho ninia tema “Promove sosiedade ne’ebé pasífika, justa no inkluziva”.

Eis Prezidente Repúblika ne’e fó-sai katak, organizasaun internasionál ne’e mosu tanba esforsu Timor-Leste nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here