Prezidente Partidu CNRT, Kay Rala Xanana Gusmão. Imajen/Eugénio Pereira

DILI, 26 abríl 2021 (TATOLI)—Prezidente Partidu Congresso Nacional de Reconstrução de Timorense (CNRT), Kay Rala Xanana Gusmão, apela ba Timor-oan hotu atu konsidera propagasaun surtu COVID-19 nu’udar problema sériu tanba moras ne’e invizivel.

Notísia Relevante: Xanana husu militante CNRT halo reflesaun-labele lakon esperansa

“Ha’u apela ba Timor-oan hotu atu konsidera katak propagasaun surtu COVID-19 ne’e hanesan problema sériu ida. Ita iha Estadu Emerjénsia dala hira tiha ona. Tanba ne’e, ha’u lori Partidu CNRT nia naran husu ba hotu-hotu atu kuidadu aan nafatin tanba inimigu ne’ebé ita hasoru ne’e ita temi dehan invizivel,” Kay Rala Xanana Gusmão hato’o nia mensajen polítika ne’e liuhosi konferénsia imprensa iha selebrasaun aniversáriu Partidu CNRT ba dala-14 (26 abríl 2007-2021), iha Bairru dos Grilhos, Dili, segunda ne’e.

Xanana haktuir, ikus-ikus ne’e Timor-Leste hasoru problema pandemia COVID-19 ne’ebé afeta mundu tomak no hamate ona ema millaun tanba iha Índia de’it kada loron liu rihun 500 mak hetan moras ne’e no mate.

Xanana dehan, sorte Timor-Leste nu’udar rai-kiik-oan no ladún dezenvolvidu tanba ladún sai hanesan fatin ida ba turizmu internasionál.

Tanba ne’e mak Eis Prezidente Repúblika ne’e la’o ba fronteira, la’o haleu territóriu nasionál hodi fó hatene katak taka tiha fronteira, nune’e redús COVID-19 labele tama mai territóriu Timor-Leste nian.

Nia hatutan, ohin loron rona katak ema barak iha Timor-Leste mak hetan ona moras ne’e maibé kondisaun rekupera hafoin kumpre izolamentu durante semana rua nia laran. Ida-ne’e sorte boot ba Timor-Leste tanba COVID-19 mosu iha Xina, depois da’et ba Europa no rai seluk sempre dehan kazu importadu katak mai hosi rai-li’ur.

“Tanba ne’e ita tenke tau nafatin atensaun ba problema ida-ne’e, ha’u la’o haleu kona-ba problema ida-ne’e. Maibé ita hotu tenke hanoin katak ita só bele kombate COVID-19 bainhira ema hotu-hotu tuir regra, labele tama-sai fronteira arbiru. Maibé, maluk balun sente sira boot liu ona tama-sai arbiru, sira-ne’e mak perigozu ba ita,” Xanana Gusmão hateten.

Xanana apela ba sidadaun hotu atu kumpre regra nune’e moras ne’e labele da’et ba maluk sira seluk no da’et ne’e mak hamosu problema boot tanba la hatene nia da’et ba to’o iha-ne’ebé.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here