Timor-oan 35 husu klarifikasaun Ajénsia Viajen, relasiona ho viajen ne’ebé la to’o destinasaun, iha edifísiu Narpov Ateita, Fatuhada, segunda (26/04). Imajen TATOLI/Natalino Costa

DILI, 26 abríl 2021 (TATOLI)—Timor-oan na’in-35 ne’ebé antes ne’e sosa billete hosi Ajénsia Viajen, Narpov Ateita, ho destinasaun Dili-Inglaterra, husu atu devolve sira-nia osan tanba sira la to’o iha fatin destinasaun tuir billete ne’ebé sira sosa.

Timor-oan hirak ne’e konsege halo viajen to’o de’it iha Kuala Lumpur, Malázia (fatin tránzitu) no labele kontinua voo tanba falla iha prosesu administrasaun, maibé iha loron 24 abríl konsege filafali mai Dili ho ajuda hosi Responsável ba ekipa Fly Timor, Pedro M. Carrascalão, Embaixada Timor-Leste iha Malázia no Malino Air.

Notísia relevante: Timor-oan 35 ne’ebé enfrenta problema iha Malázia to’o fali Dili

Tanba ne’e, Reprezentante timor-oan na’in-35, Edio Abílio Sarmento, hamutuk ho nia maluk sira, mai iha ajénsia viajen ne’e atu husu klarifikasaun.

“Ami husu ajénsia fó fila ami-nia osan no husu halo karta mai ami hodi karik iha posibilidade bele aranka fali tanba buat hotu falla hosi ajénsia,” Edio Abílio hateten iha edifísiu Narpov Ateita, Fatuhada, segunda ohin.

Aleinde ne’e, dokumentu pasajeiru sira ne’ebé ajénsia viajen trata, bainhira to’o imigrasaun Malázia ofisiál sira la simu.

“Ami lori dokumentu ne’ebé Ajénsia Narpov trata ba ami, to’o Malázia ema lahetene no husu hosi ne’ebé. Ho ida-ne’e ami konfirma atu aranka ba Inglaterra maibé labele tanba ami-nia dokumentu COVID-19 (PCR) laiha orijinál. Tanba ne’e, ami husu ajénsia tenke buka dalan hodi rezolve problema tanba ami maioria balun fa’an uma no rai hodi aranka maibé ajénsia la’ós ajuda, aumenta tan problema, situasaun agora ema hotu laiha osan,” nia haktuir.

Hatan ba kestaun ne’e, Responsável Ajénsia viajen Narpov Ateita, José Alexander Guterres, husu atu fó tempu hodi ajénsia rezolve problema ne’e.

“Ha’u husu sira fó tempu mai ami semana rua hodi rezolve kestaun ne’e,” nia dehan.

Responsável be’e rejeita informasaun kona-na ajénsia trata dokumentu pasajeiru la másimu no la kompletu.

“Antes sira bá, buat hotu la’o di’ak, maibé kona-ba teste PCR pasajeiru, momentu ne’ebá ajénsia rasik maka lori pasajeiru bá teste iha Laboratóriu Nasionál Hospital Nasional Guido Valadares (HNGV) no rezultadu ne’e rasik mai hosi Sala Situasaun-Sentru Integradu Jestaun Krize (CIGC, sigla portugés CIGC),” nia tenik.

Atrazu iha dokumentu

 Iha fatin hanesan, Pedro Carrascalão ne’ebé ajuda timor-oan na’in-35 fila mai Timór, hateten, nia asaun hosi vontade rasik tanba haree maluk sira enfrenta problema viajen bá Inglaterra tanba atrazu iha dokumentu.

“Momentu aviaun seidauk mai, sira (Malindo) fó hatene ona ba Ajénsia viajen atu submete dokumentu semana rua antes, maibé ha’u hein dokumentu la to’o Ministru Transporte no Komunikasaun nia fatin, ikus atu arranka maka ajénsia foin submete, ne’e labele,” nia dehan.

Tuir nia, dokumentu sira tenke trata uluk maka bele prosesa billete pasajeiru sira.

“Tuir regra, pasajeiru ida bainhira halo tránzitu iha aeroportu, ema sira orienta ona karik pasajeiru iha problema, sira haruka filafali tanba falta dokumentu maibé ita-nia maluk sira-nia dokumentu la bá,” nia esplika.

Antes ne’e, parte Malindo Air fó hatene ona pasajeiru hodi verifika dokumentu molok atu aranka ba Malázia.

“Iha rute ne’e rasik, pasajeiru hosi Dili bá hosi Malázia sei liu Barcelona, entaun kuandu timor-oan ho pasaporte Portugal tama Barcelona iha situasaun hanesan ne’e sira la simu. Ho ida-ne’e maka ha’u rasik husu atu labele kontiua viajen tanba sira kuandu bá sei iha problema,” nia akresenta.

Nune’e, timor-oan na’in-35 konsege paradu iha Malázia hosi loron 18 to’o 24 abríl, ne’ebé Pedro Carrascalão no Malindo Air mak ajuda haree ba alojamentu.

“Ha’u kontaktu ho Malindo iha Malazia hodi tau pasajeiru iha otél, entaun ha’u rasik transfere osan $10.000 no ajénsia $10.000. Ha’u husu ajénsia aumenta osan balun hodi selu otél no agora sira konsege fila ona,” nia haktuir.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here