Ekipa saúde liña frente halo atendimentu ba pasajeiru Timor-oan na’in-53 ne’ebé fila mai Timor-Leste ho Melindo Airline iha Aeroportu Prezidente Nicolau dos Reis Lobato, Dili, sábadu 24 abril 2021. Imajen Tatoli/António Gonçalves

DILI, 24  abríl  2021 (TATOLI) – Timor-oan na’in-35 ne’ebé enfrenta problema iha Kuala Lumpur International Airport, sábadu ne’e, ho aviaun Malindo to’o hikas fali ona Timor-Leste liuhosi Aeroportu Internasionál Prezidente Nicolau dos Reis Lobato.

Notísia Relevante : Aban, aviaun Malindo sei halo voo Malázia-Dili tula pasajeiru 71

Iha domingu (18/04), Timor-oan na’in-71 ho aviaun Malindo dezloka ba Eropa liuhosi Kuala Lumpur International Airport. Maibé Timor-oan na’in-35 ne’ebé utiliza pasaporte RDTL (Republica Democratica de Timor Leste)  la bele hakur liu ba Eropa tanba sira iha problema ba tiketi fila nian laiha no la prienxe mós rekizitu balun ne’ebé Eropa aplika.

Pedro Carrascalão. Imajen Tatoli/António Gonçalves

To’o iha Aeroportu Prezidente Nicolau dos Reis Lobato, Dili, Pedro Carrascalão, informa katak entre pasajeiru sira-ne’e na’in-18 mak iha Pasaporte Portugal no  na’in-35 mak  iha Pasaporte Timor-Leste nian. Iha mós pasajeiru na’in-17 mak ohin dadeer kontinua sira-nia vou  ho aviaun Europa nian ba Lizboa, Portugal.

Sira na’in-35 ho pasaporte RDTL ne’e mak fila hikas mai Timor-Leste no iha mós  Timor-oan na’in-ida sei kumpre hela kuarentena obrigatóriu iha Malázia tanba hetan pozitivu COVID-19.

Timor-oan na’in-35 ne’ebé fila mai Timor-Leste  to’o iha Dili, tuku 12:30 Otl, ho apoiu hosi Pedro  Carrascalão rasik, Embaixada Timor-Leste iha Malázia ho mós  Malindo Airline.

Pedro Carrascalão hateten, razaun pasajeiru sira-ne’e laliu tanba hakerek iha regra dehan PCR test no teste swab iha Timor-Leste mak laiha kualidade.

Timor-oan 53 fila mai Timor-Leste liuhosi Aeroportu Prezidente Nicolau dos Reis Lobato, sábadu 24 abríl 2021. Imajen Tatoli/António Gonçalves

“Ha’u haree hakerek iha regra ne’e katak rezultadu teste PCR no teste COVID-19 hosi Timor ne’e kualidade laiha, entaun ha’u haree buat ne’e ha’u dehan tebes, ita Timor la’ós ita mak hakarak inventa hanesan ne’e, buat ne’e ajuda hosi Organizasaun Mundial Saúde (OMS) ho Austrália mós ajuda nusa mak buat hanesan ne’e mosu fali,” Pedro Carrascalão haktuir.

Tuir nia, sei iha razaun entre Governu ho Governu hodi bele rezolve problema ne’e tanba pasajeiru-sira ne’e sai vítima hotu tanba ne’e nia esforsu hodi ohin sira to’o ona iha Timor-Leste.

“Ho ida-ne’e motiva ha’u no nu’udar Timor-oan ida, ha’u tenta ajuda sira no ohin loron sira fila ona mai Timor-Leste. Maske la’ós ona ha’u-nia responsabilidade,” Pedro Carrascalão tenik.

Kona-ba alojamentu ba han-hemu no ótel nian iha Malázia, hosi  hosi loron 18 to’o loron 22 abríl, Pedro Carrascalão rasik ajuda $10.000 no Melindo Airline mós ajuda $10.000.

“Kona-ba osan hodi charter fali aviaun Melindo tula Timor-oan sira-ne’e mai fali Timor-Leste, ha’u rasik maka hasai osan hodi selu,” saudozu Mario Viegas Carrascalão nia oan mane ne’e hateten.

Timor-oan na’in-35 ne’e, bainhira tún hosi Malindo Airline kontinua kumpre protokolu saúde públiku hanesan uza máskara, luvas, fase-liman no submete ba kuarentena obrigatóriu durante loron-14.

Jornalista : Osória Marques

Editór        : Francisco Simões

HAKEREK NO HATÁN

Please enter your comment!
Please enter your name here