Fatin izolamentu pasiente COVID-19, iha Tasi-tolu, Dili. Imajen TATOLI/António Gonçalves.

DILI, 25 abríl 2021 (TATOLI)–Sala Situasaun-Sentru Integradu Jestaun Krize (CIGC, sigla portugés) rejista kazu pozitivu COVID-19 foun ohin loron hamutuk 89, rekuperadu 29 no kazu ativu ne’ebé baixa iha sala izolamentu hamutuk 1.016.

“Totál kazu foun ohin, kompostu hosi mane 49 no feto 40, asintomátiku 74 (83,1%) no sintomátiku neen (16,9%). Kazu foun hirak-ne’e iha na’in-74 (83,1%) deteta tamba halo teste ho razaun atu halo viajen ka halo ona viajen ba muníspiu hafoin deteta pozitivu no sira-nia hela fatin iha Dili, iha cluster sira ne’ebé iha kazu detetadu barak,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, relata liuhosi nota komunikadu ne’ebé Agência TATOLI asesu, domingu ne’e.

Nune’e, totál kazu konfirmadu kumulativu sura hosi 21 marsu 2020 hamutuk 1.897 no totál detadu 89 ohin, na’in-70 hosi Dili no munisípiu seluk 19.

“Hosi horiseik mai ohin, Laboratóriu Nasionál Saúde halo teste Polymerase Chain Reaction (PCR) 692, kompostu hosi vijilánsia sentinela 35, rastreiu ba kontaktu ka contact tracing 35, rastreiu aleatoriu ka random screening 20, viajen sai hosi serka sanitária munisípiu Dili 465, viajen internasionál 13, follow up iha kuarentena 124, teste follow up ha fatin izolamentu 37 (27 negativu ona no 10 sei nafatin pozitivu),” Koordenadór informa.

Aleinde ne’e, ohin loron iha izolamentu Vera Cruz iha kazu detetadu na’in-19, iha área obstetrisia na’in-neen, medisina interna na’in-10, no pediatria tolu.

“Sira na’in-neen iha obstetrisia ho kategoria moderadu hotu no sira-nia kondisaun estável. Sira na’in-10 ne’ebé iha medisina interna, tolu grave, hitu moderadu no na’in-tolu grave, ida uza ventiladór no rekupera di’ak kompara ho loron hirak liubá, enkuantu na’in-rua seluk uza oksijéniu ho mask,” Portavós CIGC dehan.

Enkuantu, kazu tolu iha pediatria, ida moderadu no na’in rua grave, ne’ebé daudaun uza Continuous Pozitive Airway Pressure (CPAP) no ida moderadu uza oxijéniu ho mask.

“CIGC apela ba populasaun iha Dili laran no iha munisípiu sira seluk, atu aprezenta-an iha fasilidade saúde públika (Sentru Saúde ka Ospitál) ne’ebé besik bainhira sente isin-manas, kakorok moras, inus-ben, ka mear, hodi bele hetan atendimentu hosi profisionál saúde sira,” Koordenadór apela.

Jornalista: Nelson de Sousa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here