MEJD Armindo Maia, foin lalais ne'e, halo lansamentu ba distribuisaun rezumu matéria ba estudante-sira. Imajen Tatoli/Tomé Amado

DILI, 24 abríl 2021 (TATOLI) – Diretór Servisu Edukasaun Munisípiu Dili, Duarte Bragansa husu bá inspetór eskolár sira atu kontrola eskola ne’ebé la halo preparasaun rezumu matéria ba alunu sira  nune’e ajuda alunu sira iha ezame períodu dahuluk nian.

Notísia Relevante : MEJD distribui rezumu matéria primeiru periodu ba estudante 1.170

Duarte konsidera eskola ensinu báziku públiku no sekundáriu jerál inklui tékniku vokasionál barak mak seidauk halo distribuisaun rezumu matéria ba alunu sira tanba seidauk iha preparasaun.

“Ha’u fó ona atensaun ba diretór eskola Ensinu Báziku Sentrál Akadiruhun, tanba nia seidauk halo distribuisaun rezumu matéria ba estudante sira. ha’u hateten ba nia, ita boot hatene lansamentu distribuisaun rezumu matéria ba alunu sira iha EBF Balibar ka lae.  Se ita hatene tanbasá mak to’o agora la halo preparasaun rezumu matéria ba alunu-sira. Maibé nia dehan ami sei prepara,”  Duarte Bragansa  haktuir Agênsia Tatoli iha edifísiu Ministériu Edukasaun, Juventude no Desportu (MEJD) Vila Verde, Dili,  sábadu ne’e.

Duarte Bragansa   orienta ona inspetór eskola atu halo kontrolu ba eskola sira atu haree preparasaun eskola sira kona-ba distribuisaun rezumu matéria ba alunu-sira no bainhira eskola-sira halo distribuisaun tenke anota hodi halo aprezentasaun.

“Eskola ne’ebé mak seidauk prepara tenke fó xamada atensaun atu sira bele hakfodak hodi halo servisu ho responsabilidade,” Duarte Bragansa afirma.

Hosi sorin seluk Koordenadora eskola Ensinu Báziku Filiál (EBF) siklu 1,2 Tasi-Tolu, Filomena Casmira hateten, sira seidauk halo preparasaun rezumu matéria atu distribui ba estudante-sira tanba sei hein hela orientasaun hosi diretór sentru iha eskola Ensinu Báziku Sentrál (EBC) 30 de agostu Comoro.

“Ha’u foin remata enkontru ho profesores sira, ami deside segunda sei hasoru inan-aman hodi pasa hela informasaun ba sira kona-ba loron atu mai foti rezumu matéria ne’ebé segunda mak ami foin prepara,” nia hateten iha Tasi-Tolu.

Nia dehan molok atu prepara rezumu matéria tenke iha mós koordenasaun ho diretór eskola sentru para atu haree hamutuk rezumu matéria sira ne’e.

Koordenadora eskola Ensinu Báziku Filiál Dique de Caxias, Bemori, Dili, Eliza Gama informa mós katak sira halo hotu ona preparasaun rezumu matéria ba alunu sira, maibé seidauk kopia no  segunda-feira (26/04), kuandu halo kopia hotu ona mak foin distribui ba alunu-sira atu lori ba uma hodi estudante no prienxe.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here