MEJD Armindo Maia, simbolikamente distribui rezumu matéria primeiru periodu ba estudante 1.170, segunda (19/04/2021). Imajen Tatoli/Tomé Amado

DILI, 19 abríl 2021 (TATOLI) – Ministru Edukasaun Juventude no Desportu (MEJD), Armindo Maia, segunda ne’e, ofisiálmente distribui rezumu matéria primeiru periodu ba estudante 1.170.

Serimónia distribuisaun rezumu matéria  ne’e simbolikamente hala’o iha Eskola Bázika Filiál (EBF) Balibar ne’ebé korresponde mós eskola EBC Darlau,  EBF Ailok, EBF Lelaus no EBF Memoriál Fatunaba.

Notísia Relevante : Eskola-sira prepara rezumu matéria fahe ba estudante-sira

 “Rezumu matéria ne’ebé ita distribui ba estudante-sira iha eskola EBF Balibar ne’e maka matéria siénsia naturaís, siénsia sosiál, matemátika, jeografia, fízika, biolojia, relijiaun morál, no edukasaun fízika no desportu,” MEJD Armindo Maia hateten ba jornalista-sira iha ámbitu serimónia  distribuisaun matéria primeiru periodu ne’e iha EBF Balibar.

Ministru Armindo Maia, informa ida-ne’e hanesan faze dahuluk tanba tuir mai MEJD sei distribui matéria primeiru periodu nian ba munisípiu sira seluk ne’ebé kumpre hela serka sanitaria.

Nia esplika rezumu matéria sira ne’e iha mós pergunta lubuk ida para atu ajuda estudante sira bele estuda no prienxe iha uma. Nune’e, to’o tempu Governu loke hikas fali eskola, estudante-sira sei intriga fali rezultadu hosi rezumu matéria ne’ebé sira simu ona ba eskola para profesór-sira bele halo fali avaliasaun.

Serimónia lansamentu distribuisaun rezumu matéria primeiru periodu iha EBF Balibar ne’e partisipa mós husi Diretór Edukasaun pre-Eskolár Ensinu Báziku no Ensinu Rekorrente, Diretór Edukasaun Munisípiu Dili, Diretór Eskola Báziku Sentrál Darlau, Koordenadór EBF haat, xefe suku Balibar, profesór-sira no inan-aman hosi estudante-sira.

 Jornalista      : Tomé Amado

Editór             : Francisco Simões

 

HAKEREK NO HATÁN

Please enter your comment!
Please enter your name here