Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 23 abríl 2021 (TATOLI) – Ministériu Ensinu Superior Siénsia no Kultura (MESSK) ezekuta ona Orsamentu Jerál Estadu (OJE) 2021 iha trimestre dahuluk 23%.

Ministru Ensinu Superior Siénsia no Kultura (MESSK), Longuinhos dos Santos, informa ezekusaun orsamentu sira ne’e bazeadu ba planu, programa no kompromisu ne’ebé iha ona.

Notísia Relevante : MESSK seidauk simu pedidu UNTL atu realiza graduasaun virtuál

“Ami-nia kompromisu hosi inísiu hakarak atinje ezekusaun iha trimestre dahuluk (janeiru-marsu) tenke to’o 24%,  maibé realidade labele atinje tanba mosu obstákulu ne’ebé sai dezafiu ba mundu globál inklui TL rasik maka pandemia COVID-19 ne’ebé obriga Governu implementa serka sanitária entaun hamenus movimentu sira atu dezloka ba munisípiu,” Ministru  Longuinhos dos Santos, hateten ba Agência Tatoli iha Parlamentu Nasionál, sesta ne’e.

Ministru Longuinhos, klarifika katak MSSK iha  planu no programa atu dezloka ba munisípiu atu halo avaliasaun ba klase paralelu ne’ebé ensinu superior sira kria hela. Ministériu hakarak hatene progresu ensinu aprendizajen ne’e la’o oinsá no sira-nia fasilidade, inklui dosente  bele apoiu klase paralelu ne’e ka lae.

Programa-sira ne’ebé mak MESSK realiza ona hodi atinje ezekusaun orsamentu trimestre dahuluk 23% ne’e maka programa UNESCO nian, programa  boa Governasaun, Arte no Kultura inklui programa ba avaliasaun ensinu superiór-sira iha klase paralelu.

“Ami hein ezekusaun trimestre daruak nian ne’e hakarak  atinje 50% no foti metade hosi ezekusaun ne’ebé la konsege atinje hodi halo kompleta fali 50%,” Ministru  Longuinhos dos Santos tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here