Ekipa liña frente hosi SIJK. Imajen Tatoli/António Gonçalves.

DILI, 23 abríl 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 foun hamutuk 82, rekoperadu 19 no kazu ativu 925.

“Totál kazu konfirmadu kumulativu sura hosi 21 marsu 2020 hamutuk 1.739. Totál detetadu 82 ohin, 72 iha Dili, Munisípiu seluk 10. Totál kazu ativu 925,’’ Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, Rui Maria de Araújo hateten via komunikadu, sesta ne’e.

Notísia relevante:COVID-19: kazu foun 148, rekoperadu 35 no ativu 862

Hosi totál kazu detetadu foun ohin mane 50, feto 32, sintomátiku 10, asintomátiku 72 (87,8%). Kazu foun hirak-ne’e, iha 51 (62,1%) mak detetadu tanba atu viajen ba Munisípiu, hafoin deteta pozitivu. Sira-nia hela fatin, iha Dili, iha duni cluster sira ne’ebé iha kazu detetadu barak.

Hosi horisehik mai ohin, hamutuk hotu Laboratóriu Nasionál Saúde halo testes PCR 950, ho detalla hanesan tuir mai, Vijilánsia sentinela 44,  Rastreiu ba kontaktu ka Contact tracing 100. Rastreiu Aleatóriu ka Random Screening 245, Viajen sai hosi serka sanitária Munisípiu Dili 481, Viajen internasionál 31, Follow up iha kuarentena 49.

Informasaun adisionál iha 23 abríl, izolamentu Vera Cruz iha kazu detetadu na’in 15 hanesan ho horisehik, iha área obstetrisia na’in-tolu, medisina interna na’in-sia, pediatria tolu.

Sira na’in-tolu  iha obstetrisia, kategoria moderadu hotu, sira-nia kondisaun estável. Sira na’in-sia iha medisina interna  rua grave,  hitu moderadu,  na’in-rua garve, ida uza  ventiladór,  ida uza  CPAP (Continuous Pozitive  Airway  Pressure).

Kazu tolu pediatria, ida moderadu, na’in-rua  grave. Na’in rua grave, ida uza ventiladór, ida horisehik uza (Continuous Pozitive Airway  Pressure), maibé ohin uza de’it ona oxijéniu ho mask.

SIJK informa mós katak ohin, funerál ba óbitu ne’ebé akontese horisehik iha Munisípiu Dili, la’o ho di’ak. Família matebian deside hakoi iha semitériu públiku Becusse, no ekipa konjunta funerál, hosi Ministériu Saúde, MSSI ho MAE apoia prosesu funerál tuir protokolu ne’ebé estabelesidu ona, hodi minimiza risku atu mosu kontájiu virus hosi matebian nia-isin ba fali ema seluk.

Apela ba populasaun iha Dili laran no mós iha Munisípiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, inus-been, me’ar hodi bele hetan atendimentu hosi profisionál saúde-sira.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here