Sentru izolamentu Vera Cruz. Imajen Tatoli/Egas Cristóvão.

DILI, 22 abríl 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 foun hamutuk 148, rekoperadu 35 no totál kazu ativu 862.

“Kazu detetatu foun 148,  mai hosi Dili 118, Munisípiu seluk 30.  Hosi totál kazu detetadu ne’e mane 79, feto 69, asintomátiku 141 (95,2%) no sintomátiku hitu. Iha mós kazu rekoperadu 35. To’o ohin, totál kazu ativu 862. Kazu konfirmadu kumulativu sura hosi 21 marsu 2020 hamutuk 1.657,” Koordenadór Forsa-Tarefa ba Prevensaun no Mitigasaun, Rui Maria de Araújo, relata liu hosi komunikadu, kinta ne’e.

Notísia relevante:COVID-19: kazu foun 57, rekoperadu 33 no ativu 749

Hosi totál kazu detetadu foun ohin, 62 (41,8%) mak detetadu tanba halo teste ho razaun atu halo viajen ka halo ona viajen ba Munisípiu, hafoin deteta pozitivu.

Maski nune’e, sira ne’ebé rezultadu teste pozitivu, maioria sira-nia hela fatin, iha duni cluster-sira ne’ebé iha kazu detetadu barak.

Hosi horisehik mai ohin, hamutuk hotu Laboratóriu Nasionál Saúde halo  teste PCR 1.218, ho detalla hanesan tuir mai, Vijilánsia sentinela 48, Rastreiu ba kontaktu k aContact tracing 130, Rastreiu Aleatóriu ka Random Screening 362, Viajen sai hosi serka sanitária Munisípiu Dili 605, Viajen internasionál 28 no Follow up iha kuarentena 44.

Informasaun adisionál

Iha 22 abríl 2021, izolamentu Vera Cruz iha kazu detetadu na’in 15. Iha área obstetrisia na’in-tolu, medisina interna na’in-sia, pediatria na’in-tolu. Sira na’in-tolu iha obstetrisia, kategoria moderadu hotu, sira nia kondisun estável.

Sira na’in-sia iha medisina interna, rua grave, hitu moderadu. Na’in rua grave, ida uza ventiladór, ida uza CPAP (Continuous Positive Airway Pressure).

Kazu tolu pediatria, ida moderadu, na’in-rua grave. Na’in-rua grave ne’e uza CPAP, no ida moderadu uza oxijéniu ho kanula.

Apelu

SIJK apela ba populasaun iha Dili laran no mós iha Munisípiu-sira seluk, atu aprezenta-an iha fasilidade saúde públika (Sentru Saúde ka Ospitál) ne’ebé besik, bainhira sente isin-manas, ka kakorok moras, inus-been, me’ar hodi bele hetan atendimentu hosi profisionál saúde-sira.

Bainhira sedu liu hatene bainhira virus ne’e kona ka la’e, di’ak liu ba fasilidade saúde, nune’e bele hetan atendimentu sedu liu, no prevene tama ba iha situasaun kritiku.

Apela ba joven-sira atu nafatin kuidadu-an, hodi la hetan da’et virus SARS-COV-2, hosi ema ruma, bainhira la’o sai hosi uma, hafoin da’et tutan ba ferik ho katuas-sira iha uma-laran.

Sira ne’ebé idade tinan 60 ba leten, no sira ne’ebé sofre ho moras seluk tan, vulnerável liu atu tama iha kategoria moderadu no grave, bainhira hetan da’et hosi virus-ne’e.

Ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona atu prevene moras COVID-19 da’et ba mai.

Notísia relevante:COVID-19: Olga Mendonça sei haloot iha semitériu Becusse

Jornalista: Felicidade Ximenes

Editór: Cipriano  Colo

PUBLISIDADEiklan

HAKEREK NO HATÁN

Please enter your comment!
Please enter your name here