Reitór UNTL, João Soares Martins, hamutuk ho estrutura halo abertura ba Ano Letivu 2021 iha Auditorium Liceu, Kinta (08/05). Imajen Tatoli/Egas Cristovão

DILI, 22 abríl 2021 (TATOLI) – Universidade Nasionál Timor Lorosa’e (UNTL) kontribui kortés orsamentu millaun $1.116 hodi responde ba kalamidade hosi kauza dezastre naturál.

Notísia Relevante : Estudante finalista 36 hosi UNTL sei tuir graduasaun virtuál

Magnífiku Reitór UNTL, João Soares Martins, hateten ba jornalista-sira katak orsamentu millaun $1.116 ne’ebé ko’a ona hodi apoiu kalamidade iha nasaun ne’e hasai hosi orsamentu fundus kapitál dezenvolvimentu ne’ebé prevee ona atu hala’o programa kona-ba boa governasaun no jestaun institusionál.

“PN husu instituisaun Estadu inklui UNTL tenke kortés orsamentu atu responde kalamidade iha nasaun ne’e. UNTL kontribui maibé ami husu ba Governu labele haluha 2022 tenke re-aloka fali tanba ami realiza tiha ona anunsia balun ba públiku ho orsamentu ne’ebé ami prevee,” João Soares Martins hateten iha kampus UNTL, Dili.

João Soares Martins esplika, kontribuisaun Instituisaun estadu sira inklui UNTL tanba hetan orientasaun husi Parlamentu Nasionál. Tuir nian maske orsamentu prevee bá item ida ne’e ki’ik maibé sira tenke kontribui hodi responde nesesidade populasaun Timor laran, inklui kapitál Dili ne’ebé  afetadu ba inundasaun.

“Ami prevee orsamentu ba  kapitál dezenvolvimentu iha de’it millaun $2.394 agora ko’a tiha millaun $1.116, sei hela metade maibé ami sei labele realiza programa ne’ebé planeia ona ho efetividade,” nia tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here