Reitór UNTL, João Soares Martins. Imajen Tatoli/Egas Cristóvão.

DILI, 22 abríl 2021 (TATOLI) – Estudante finalista na’in-36 hosi Fakuldade Medisina Jerál, Universidade Nasionál Timor Lorosa’e (UNTL) sei tuir graduasaun virtuál ka online.

Magnífiku Reitór UNTL, João Soares Martins, ba jornalista sira, informa, programa graduasaun ho plataforma virtuál ka online ne’e foin mak lansa iha pájina UNTL nian, maibé iha ona estudante na’in-36 hosi Medisina Jerál mak halo ona inskrisaun.

“Ami foin mak lansa informasaun, ami seidauk deside bainhira mak atu realiza, maibé ami-nia estudante medisina jerál na’in-36 mak halo ona inskrisaun atu tuir graduasaun online,”  João Soares Martins, hateten iha kampus UNTL, kinta ne’e.

Reitór ne’e afirma katak programa graduasaun virtuál ka online ne’e UNTL loke ba sira ne’ebé hakarak. Maibé sira ne’ebé lakohi parte universidade kontinua hein to’o baihira Governu deside hapara ona serka sanitária mak foin bele realiza graduasaun jerál.

“Karik serka sanitária ne’e mak kontinua ita lahatene bainhira mak atu halo graduasaun jerál ba estudante sira. Ne’e duni, ami koko aplika media graduasaun virtuál ka online ne’e hodi ajuda estudante finalista-sira atu kontinua hala’o sira-nia estudu ka buka servisu,” João Soares Martins tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here