Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves.

DILI, 22 abríl 2021 (TATOLI)—Sekretária Estadu Protesaun Sivíl (SEPS), koordena ona ho Polísia Marítima, atu buka-tuir mate-isin na’in 10 ne’ebé lakon durante inundasaun iha 04 abríl to’o oras ne’e seidauk hetan.

“Ita koordena ona ho Polísia Marítima bainhira halo patrulla  iha tasi atu buka mós, tanba dezastre naturál ne’ebé akontese, rai-monu taka ema no mós mota lori,” SEPS, Joaquim Gusmão, hateten ba jornalista Agência Tatoli iha Aeroportu Comoro, Dili, kinta ne’e.

Notísia relevante:SEPS-MAE halo levantamentu ba uma estragu tanba inundasaun

Joaquim Gusmão rekoñese katak, SEPS halo ona esforsu másimu hamutuk ho família no komunidade hodi buka-tuir mate-isin hirak-ne’e, maibé difísil atu hetan.

“Husu família vítima-sira atu simu kondisaun ida-ne’e tanba difisíl atu hetan, maibé ita esforsu nafatin,” nia husu.

Dadus provizóriu hosi SEPS, inundasaun ne’ebé akontese iha territóriu hamate ema na’in 45 no na’in 35 mak hetan ona, na’in 10 mak seidauk hetan.

Hosi na’in 35 ne’e, na’in 20 iha Munisípiu Dili, na’in-neen iha Ainaro, Viqueque na’in-tolu, Covalima na’in-rua, Manatuto na’in-rua, Aileu na’in-ida no Baucau na’in-ida.

Nune’e mós dadus ofisiál hosi Ministériu Administrasaun Estatál (MAE), provizoriamente iha família 25.207 mak afetada ba inundasaun iha territóriu.

Ekipa MAE, SEPS no seluk-tan kontinua halo levantamentu hodi identifika kategoria estragu natón, kamán no aat totál atu bele hetan apoiu rekoperasaun.

Notísia relevante:SEPS apoia ona família 5.323 iha Dili

Jornalista: Nelson de Sousa

Editór: Cipriano  Colo

PUBLISIDADEiklan

HAKEREK NO HATÁN

Please enter your comment!
Please enter your name here