Kondisaun mota Comoro durante inundasaun iha kapitál Dili, domingu (04/04). Imajen TATOLI/António Gonçalves

DILI, 12 abríl 2021 (TATOLI)–Udan ho intensidade boot, akompaña ho anin boot to’o provoka inundasaun iha domingu (04/04) kuaze akontese iha munisípiu hotu, inklui kapitál Dili ne’ebé mak hetan impaktu maka’as to’o ema barak lakon hela fatin no tenke refujia ba fatin evakuasaun provizóriu.

Ba vítima dezastre naturál ne’ebé lakon uma, Sekretaria Estadu Protesaun Sivíl (SEPS) no Ministériu Administrasaun Estatál (MAE), daudaun halo hela levantamentu dadus no klasifika ona uma ne’ebé a’at.

Tuir Sekretáriu Estadu Protesaun Sivíl, Joaquim Gusmão, SEPS no MAE fahe ona formuláriu multi-setorál hodi identifika uma sira ne’ebé maka iha mota ninin, foho leten no rai halai atubele hadi’a filafali.

“Ita identifika hotu uma sira ne’ebé a’at, hosi protesaun sivíl, ne’ebé iha tipu estragu tolu hanesan kma’an, no ladún no estragu hotu kedan, maibé la a’at sei la hadi’a,” Sekretáriu Estadu Joaquim Gusmão hateten iha Aeroportu Comoro, segunda ne’e.

Notísia relevante: Ema 10.000 lakon uma iha Dili durante dezastre naturál

Nia dehan, hosi kategoria tolu maka foin fó asisténsia tuir padraun ne’ebé maka agora protesaun sivíl iha.

“Agora ita la’o daudaun hela hamutuk ho ita-nia xefe suku, xefe aldeia, admnistradór postu no prezidente munisípiu hodi haree kona-ba asuntu ne’e,” nia akresenta.

Tuir governante ne’e, ba oin Governu sei kria regra hodi la autoriza komunidade sira hela iha mota ninin tanba bele fó risku bainhira akontese dezastre naturál hanesan foin lalais no Governu sei buka meiu  muda sai abitante sira.

“Sira ne’ebé uma lakon ita iha kategoria, ba sira ne’ebé uma mota lori, ita tenke halo asesmentu ba sira maibé ita labele lori fali sira ba mota ibun ka mota laran,” nia hatutan.

Ba kestaun ne’e,  Ministériu Planu no Ordenamentu (MPO) iha papél halo mapamentu ba fatin sira ne’ebé risku dizastre naturál.

“Ita haree labele haruka filafali família sira bá uma, tanba ne’e Governu buka dalan atu re-aloka sira ba fatin seluk,” nia katak.

Entretantu, dadus ikus hosi protesaun sivíl, ema 10.000 lakon uma durante akontese inundasaun iha semana kotuk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here