Sentru izolamentu Vera Cruz. Imajen Tatoli/Egas Cristóvão.

DILI, 22 abríl 2021 (TATOLI)—Sala Situasaun Sentru Integradu Jestaun Krize (SIJK) deside ona hodi haloot mate-isin Olga Mendonça (61) ne’ebé hakotu-iis ho COVID-19, iha semitériu públiku Becusse, Dili.

Desizaun ne’e SIJK foti, hafoin reuniaun ho família matebian, ne’ebé konkorda atu haloot iha aban (23/04), tuir protokolu saúde.

Notísia relevante:Família hein hela mate-isin Olga Mendonça iha Vera Cruz

”Ami konkorda ho família matebian katak, haloot iha semitériu públiku Becusse. Família sei prepara rate no sei uza de’it kaixaun ne’ebé iha ona hodi haloot tuir ita-nia kultura,” Koordenadór Destakamentu Reasaun Rápida Sala Situasaun Sentru Integradu Jestaun Krize, Aurélio Guterres, hateten ba jornalista via telefónika, kinta ne’e.

Aurélio Guterres  esplika,  bainhira simu informasaun hosi sentru izolamentu Vera Cruz kona-bá pasiente COVID-19 ne’ebé hakotu-iis, ekipa óbitu hosi Pilar I, II, VI, Ministériu Saúde (MS) Ministériu Solidariedade Sosiál no Inkluzaun (MSSI),  Cruz Vermelha Timor Leste (CVTL),  Institutu Jestaun Ekipamentu (IJE), Minsitériu Obra Públika (MOP), konvoka kedan reuniaun ho família matebian no hetan ona akordu.

Tuir planu, mate-isin sei foti hosi sala izolamentu iha aban dadeer, transporta liu hosi rezidénsia durante minutu balun tuir akordu, iha rezidénsia sei la loke kaixaun, hafoin diretamente ba semitériu Becusse hodi haloot tuir kultura, no mós iha prosesu funerál ne’e sei trata hanesan ema ne’ebé hakotu-iis ho COVID-19, tuir protokolu MS no Organizasaun Mundiál Saúde (OMS).

Notísia relevante:Xanana oferese kaixaun ba matebian Olga Mendonça

Jornalista: Felicidade Ximenes

Editór: Cipriano  Colo

HAKEREK NO HATÁN

Please enter your comment!
Please enter your name here