Elikópteru hosi kompañia aviasaun MCDERMOTT Austrália ho númeru N365JA iha Aeroportu Comoro, (21/04/21). Imajen Tatoli/António Gonçalves.

DILI, 21 abríl 2021 (TATOLI)—Sekretária Estadu Protesaun Sivíl (SEPS), sei transporta apoiu emerjénsia ba Postu Administrativu Ataúro, Munisípiu Dili, hodi distribui ba família hamutuk 100, ne’ebé afetadu ba inundasaun iha 04 abríl.

Sasán emerjénsia ne’ebé SEPS sei oferese mak hanesan foos, mina bimoli, susu-been, biskuit, sardina, sasán kuziña ho seluk-tan.

Notísia relevante:Austrália ho Santos apoiu elikópteru hodi reforsa ajudu umanitáriu

SEPS, Joaquim Gusmão konsidera elikópteru ne’ebé aluga hosi Governu Austrália ho kompañia Santos, importante tebes hodi fasilita serbisu Ministéiru-sira hanesan Ministériu Solidariedade Sosiál no Inkluzaun (MSSI), Ministéiru Saúde (MS) ho sira-seluk iha situasaun kalamidade.

“Elikópteru ne’e ba parte protesaun sivíl no ami sei uza uluk atu transporta apoiu emerjénsia ba Ataúro,’’Joaquim Gusmão hateten ba jornalista Agência Tatoli iha Aeroportu Internasionál Prezidente Nicolau Lobato, Comoro, Dili, kuarta ne’e.

Maski la temi data fixu, maibé Joaquim Gusmão dehan, sei transporta apoiu emerjénsia ne’e ba  Ataúro iha tempu badak.

Governu Austrália ho kompañia Santos aluga elikópteru hosi kompañia aviasaun MCDERMOTT Austrália, durante fulan ida to’o maiu nia-rohan, atu bele transporta apoiu umanitáriu ba área remota ne’ebé la asesu ba estrada.

Elikópteru ne’e ho nia kapasidade bele tula ema na’in-ualu no sasán tonelada ida ne’ebé bele tara de’it.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here